Danamayukha 3.p66.3

3.p66.3

rukmaśṛṅgīṃ raupyakhurāṃ savastrāṃ kāṃsyadohanām | savatsāṃ kapilāṃ dattvā vaṃśān sapta samuddharet || yāvanti cāsyā romāṇi savatsāyā bhavanti hi | surabhīlokamāsādya ramate tāvatīḥ samāḥ || adyetyādi gosahasraphalāvāptyanantarasavatsakapilāromamitavarṣaparyantaṃ kāmadhenulokakāma imāṃ kapilāṃ suvarṇaśṛṅgādyupaskarayutāmamukagotrāyāmukaśarmaṇe viprāya tubhyamahaṃ sampradade na mameti dadyāt | mantro mātsye | kapile sarvabhūtānāṃ pūjanīyāsi rohiṇī | tīrthadevamayī yasmādataḥ śāntiṃ prayaccha me || tatraiva | vastraṃ tu triguṇaṃ dhenvā dakṣiṇāṃ ca caturguṇām | etairalaṅkṛtāṃ dhenu ghaṇṭābharaṇabhūṣitām || kapilāṃ vipramukhyāya dattvā mokṣamavāpnuyāt || mumukṣurvastratrayopetāṃ dattvā caturaḥ suvarṇān dakṣiṇāṃ dadyāt | dviguṇopaskaropetā mahatī kapilā smṛtā || upaskarāḥ suvarṇaśṛṅgavastradohanapātrādyāḥ sāmānyagodāne vakṣyamāṇāḥ| dattā sā vipramukhyāya svargamokṣaphalapradā | saptajanmakṛtāt pāpānmucyate daśasaṃyutaḥ || yān yān prārthayate kāmān tāṃstān prāpnoti mānavaḥ || adyetyādi saptajanmakṛtapāpanāśapūrvaka-svargakāmo mokṣakāmaḥ putrakāmaḥ śubhakāma īśvaraprītikāma ityādi yathākāmaṃ phalamullikhya dviguṇopaskarayutāṃ dadyāditi||mahākapilādānam||iti daśa mahādānāni