Danamayukha 3.p69

3.p69

athāmantraṇamantrāḥ || yā lakṣmīḥ sarvabhūtānāṃ yā ca deve vyavasthitā | dhenurūpeṇa sā devī mama śānti prayacchatu || dehasthā yā ca kalyāṇī śaṅkarasya sadā priyā | dhenurūpeṇa sā devī mama pāpaṃ vyapohatu || viṣṇorvakṣasi yā lakṣmīḥ svāhā yā ca vibhāvasoḥ | candrārkaśakraśaktiryā dhenurūpā'stu sā śriye || caturmukhasya yā lakṣmīryā lakṣmīrdhanadasya | lakṣmīryā lokapālānāṃ sā dhenurvaradā'stu me || svadhā tvaṃ pitṛmukhyānāṃ svāhā yajñabhujāṃ tathā | sarvapāpaharā dhenustasmācchāntiṃ prayaccha me iti || evamāmantrya tāṃ dhenuṃ brāhmaṇāya nivedayet | vidhānametaddhenūnāṃ sarvāsāmiha paṭhyate || sarvāsāmiti pratyakṣadhenuvyatiriktānāmityarthaḥ | uttaravacanasya tatrānupayogāt | etadeva vidhānaṃ syātta evopaskarāḥ smṛtāḥ mantrāvāhanasaṃyuktāḥ sadā parvaṇi parvaṇi || yathāśraddhaṃ pradātavyā bhuktimuktiphalapradāḥ | aśeṣayajñaphaladāḥ sarvapāpaharāḥ śubhāḥ || ayane viṣuve puṇye vyatīpāte tathā punaḥ | guḍadhenvādayo deyā upa rāgādiparvasu || atra, pāpavināśinya ityupakramāt sarvapāpaharā ityupasaṃhārācca pāpanāśa eva phalaṃ na bhuktimuktyādīti dānasaukhye | tatra putraiṣṭāvivārthavādoktānāṃ bhuktimuktyādīnāṃ tyāge mānābhāvāt | upakramopasaṃhārau tvaprayojakau | yattu padmapurāṇādāvekenaiva ghaṭena ghṛtādidhenuḥ, droṇamātreṇa ca tilena dhenuruktā, tat prakārāntaramiti kalpatarau | dānaviveke tu palasahasrapramāṇaḥ kumbha iti | dvādaśapalādhikāni pañcapalaśatāni kumbha ityanye | tataśca yathādhikāraṃ vyavasthā jñeyā | yadyapi guḍadhenvantaraṃ ghṛtadhenuruddiṣṭā, tathā'pi tilābhāve tathā dadyāt | ghṛtadhenumityuktvā tilānāṃ prādhānyāttaddhenurādāvucyate || atha tiladhenuḥ || tatra kiñcit prakārāntaraṃ viṣṇudharmottareanulipte mahīpṛṣṭhe vastrājinakuśāvṛte | dhenuṃ tilamayīṃ kṛtvā sarvaratnairalaṃkṛtām || dhenuṃ droṇena kurvīta āḍhakena tu vatsakam | suvarṇaśṛṅgīṃ raupyakhurāṃ gandhaghrāṇavatīṃ tathā || kuryācca śarkarājihvāṃ guḍāsyāmakṣikambalām | ikṣupādāṃ tāmrapṛṣṭhāṃ śucimuktāphalekṣaṇām | praśastapatraśravaṇāṃ phaladantavartīśubhābhū | sragdāmapucchāṃkurvītanavanītastanānvitām || sitasūtraśirālāṃ ca sitasarṣaparomikām | phalairmanoharairbhakṣyairmaṇimuktāphalānvitām || sitavastrayugacchannāṃ ghaṇṭābharaṇabhūṣaṇāṃm || īdṛksaṃsthānasampannāṃ kṛtvā śraddhāsamanvitaḥ| kāṃsyopadohanāṃ dadyāta keśavaḥ prīyatāmiti || phaletikarttavyatāmantrā guḍadhenūktā eva | vahnipurāṇe tu, tilāśca pitṛdaivatyā nirmitāśceha gosave | brahmaṇā tanmayī dhenurdattā prīṇātu keśavamiti mantrāntaramuktam