Danamayukha 3.p70

3.p70

atra palasahasraparimāṇaḥ kumbhaḥ | dvādaśapalādhikāni pañcapalaśatānīti vā || ikṣuyaṣṭimayān pādān khurān raupyamayām̐stathā | sauvarṇe cākṣiṇī kuryācchṛṅge cāgarukāṣṭhaje || saptadhānyamaye pārśve patrorṇena ca kambalam | kuryātturuṣkakarpūrairghāṇaṃ phalamayān stanān || tadvaccharkarayā jihvāṃ guḍakṣīramayaṃ mukham || patrorṇaṃ dhautakauśeyam | turuṣkaḥ sihlakam | sihlārarasa iti yāvat | pucchaṃ kṣaumamayaṃ kāryaṃ romāṇi sitasarṣapaiḥ tāmrapṛṣṭhaṃ vicitraṃ tu īdṛgrūpāṃ manoramām || vidhinā kṛtavatsāṃ ca kuryāllakṣaṇalakṣitām | etaiḥ kṛtvā tathā natvā pūjayitvā vidhānataḥ || tadbhaktāya pradātanyā maṅgalāśīḥsvapārage || etāṃ mamopakārāya gṛhīṣva tvaṃ dvijottama | prīyatāṃ mama deveśo ghṛtārciḥ puruṣottamaḥ | ityudāhṛtya viprāya dadyāddhenuṃ narādhipa || skānde tvayaṃ mantraḥ | ghṛtaṃ gāvaḥ prasūyante ghṛtaṃ bhūmyāṃ pratiṣṭhitam | ghṛtamagniśca devāśca ghṛtaṃ me sampradīyatāmiti || phalaṃ ca, ghṛtakṣīravahā nadyo yatra pāyasakarddamāḥ | teṣu lokeṣu sarveṣu supuṇyeṣūpajāyate || sakāmānāmidaṃ vyuṣṭiḥ kathitā nṛpasattama || vyuṣṭiḥ phalam | viṣṇulokaṃ narā yānti niṣpāpā dhenudānata ityādi || dakṣiṇātraikasuvarṇaprabhṛti yathāśaktīti madanaratne | yathāśakti hiraṇyamiti hemādrau