Danamayukha 3.p71

3.p71

atha jaladhenuḥ || tatraiva jaladhenuṃ prakramya, jalakumbhaṃ naravyāghra suvarṇarajatānvitam || suvarṇarajataśṛṅgakhurānvitamiti sāmpradāyikāḥ | ratnagarbhamaśeṣaistu grāmyairdhānyaiḥ samanvitam || sitavastrayugacchannaṃ dūrvāpallavaśobhitam | kuṣṭhamāṃsīmurośīrabālakāmalakairvṛtam || priyaṅgupatrasahitaṃ sitavastropavītinam | sacchatraṃ saupānatkaṃ darbhaviṣṭarasaṃsthitam || caturbhiḥ sambhṛtaṃ bhūpa tilapātraiścaturdiśam | sthagitaṃ dadhipātreṇa ghṛtakṣaudravṛtā mukhe || tilapātrāṇi tāmrasya dadhipātraṃ kāṃsyasyeti dānaviveke | upoṣitaḥ samabhyarcya vāsudevaṃ jaleśayam | puṣpadhūpopahāraiśca yathāvibhavamādṛtaḥ || saṅkalpya jaladhenuṃ ca kumbhaṃ tamabhipūjya ca | pūjayedvatsakaṃ tadvat kṛtaṃ jalamayaṃ budhaḥ || evaṃ sampūjya govindaṃ jaladhenuṃ savatsakām | sitavastradharaḥ śānto vītarāgo vimatsaraḥ | dadyād dvijāya rājendra prītyarthaṃ jalaśāyinaḥ || jalaśāyī jagadyoniḥ prīyatāṃ mama keśavaḥ | iti coccārya bhūpāla viprāya pratipādayet | apakvānnāśinā stheyamahorātramataḥ param | tathā, dhānyāni pārśvadvaye, kuṣṭhādīni ghrāṇadeśe, priyaṅgupatraṃ śravaṇe, yajñopavītaṃ mūrdhni sthāpayet | vatsaścaturthāṃśenaiva | dakṣiṇā śaktitaḥ suvarṇam | anena vidhinā dattvā jaladhenuṃ narādhipa oṃ sarvān kāmānavāpnoti ye divyā ye ca mānuṣā iti|| atha kṣīradhenuḥ || skānde, kṣīradhenuṃ pravakṣyāmi tāṃ nibodha narādhipa | anulipte mahīpṛṣṭhe gomayena narādhipa | gocarmamātramānena kuśānāstīrya sarvataḥ|| tatropari mahārāja nyaset kṛṣṇājinaṃ tataḥ|| tatropari kuṇḍalikāṃ gomayena kṛtāmapi || kṣīrakumbhaṃ tataḥ sthāpya caturthāṃśena vatsakam | suvarṇamukhaśṛṅgāṇi candanāgarukāṇi ca || praśastapatraśravaṇaṃ tilapātropari nyaset | mukhaṃ guḍamayaṃ tasyā jihvā śarkarayā tathā || mūlapraśastadantā ca muktāmayaphalekṣaṇā | ikṣupādā darbharomā sitakambalakambalā || tāmrapṛṣṭhā kāṃsyadohā paṭṭasūtramayaṃ tathā | pucchaṃ ca nṛpaśārdūla navanītamayastanī || svarṇaśṛṅgī raupyakhurā pañcaratnamayī bhuvi | catvāri tilapātrāṇi caturdikṣvapi sthāpayet || sapta vrīhīn samāyukto dikṣu sarvāsu mikṣipet | evaṃ lakṣaṇasaṃyuktāṃ kṣīradhenuṃ prakalpayet || ācchādya vastrayugmena gandhapuṣpaiḥ samarcayet | dhūpadīpādikaṃ kṛtvā brāhmaṇāya nivedayet || anenaiva tu mantreṇa kṣīradhenuṃ prakalpayet || anena guḍadhenūktena | prakalpayedanumantrayet | āpyāyasveti mantreṇa kṣīradhenuṃ prasādyeta | gṛhṇāmi tvāṃ viprabhaktyā grāhako mantramuccaret || evaṃ dhenuṃ pradattvā ca kṣīrāhāro dinatrayet | trirātraṃ tu payobhakṣo brāhmaṇo rājasattama || mantrastu, gṛhṇāmi tvāṃ devi bhaktyā kuṭumbārthe viśeṣataḥ || bharasva kāmairmā sarvaiḥ kṣīradheno namo'stu ta iti || etāṃ hemasahasreṇa śatenātha svaśaktitaḥ | śatārddhamathavā'pyarddhaṃ tatraivārddha svaśaktitaḥ || dadyāddhenuṃ mahārāja śṛṇu tasyāpi yat phalam | divyaṃ varṣasahasraṃ tu rudraloke mahīyate || divyavarṣasahasrā'vadhi rudralokakāma iti phalollekhaḥ saṅkalpavākye | anyadguḍadhenuvat