Kalamayukha 13.p2

13.p2

iti pādmāt | etaccāputrigṛhiviṣayam | putravatastvatrāpi niṣedhaḥ | saṅkrāntyāmupavāsaṃ ca kṛṣṇaikādaśivāsare | candrasūryagrahe caiva na kuryātputravān gṛhī || iti nāradokteḥ | āditye'hni saṅkrāntau grahaṇe candrasūryayoḥ | pāraṃ copavāsaṃ ca na kuryātputravān gṛhī || tatprayuktopavāsasya niṣedho'yamudāhṛtaḥ | prayuktyantarayuktasya na vidhirna niṣedhanam || iti jaiminismṛteśca | smṛtyantare'pi— vidhavāyā vanasthasya yateścaikādaśīdvaye | upavāso gṛhasthasya śuklāyāmeva putriṇaḥ || iti | hemādrirapyevam | kāmyāyāṃ kṛṣṇāpavādamāha nāradaḥ— putravāṃśca sabhāryaśca bandhuyuktastathaiva ca || ubhayoḥ pakṣayoḥ kāmyaṃ vrataṃ kuryāttu vaiṣṇavam || iti | vaiṣṇavaistu kṛṣṇāpyupoṣyetyāha sa eva— nityaṃ bhaktisamāyuktairna rairviṣṇuparāyaṇaiḥ | pakṣe pakṣe ca kartavyamekādaśyāmupoṣaṇam || saputraśca sabhāryaśca sa jano bhaktisaṃyuktaḥ | ekādaśyāmupavasetpakṣayorubhayorapi || tatraikādaśī dvedhā | śuddhā daśamīviddhā ca | ādyā gāruḍe— udayātprāgyadā vipra muhūrttadvayasaṃyutā | sampūrṇaikādaśī jñeyā tatraivopavasedgṛhī || iti | gṛhī vaiṣṇavaḥ | smārttaviṣaye tu tatraiva— ādityodayavelāyāmārabhya ṣaṣṭināḍikāḥ | sampūrṇaikādaśī nāma kāryā dharmaphalepsubhiḥ || iti | daśamīviddhāpi dvedhā | aruṇodayavelāyāṃ sūryodaye ca daśamīsattvena | tatrā''dyā bhaviṣyapurāṇe— aruṇodayakāle tu daśamī yadi dṛśyate | sā viddhaikādaśī tatra pāpamūlamupoṣaṇam