Kalamayukha 13.p57

13.p57

atha caturdaśī | sā tu kṛṣṇā pūrvā śuklottarā grāhyā | ‘caturdaśyā ca pūrṇimā iti yugmavākyāt— tṛtīyākādaśī ṣaṣṭhī śuklapakṣe caturdaśī | pūrvaviddhā na kartavyā kartavyā parasaṃyutā || iti nāradīyāt | kṛṣṇapakṣeṣṭamīcaiva kṛṣṇapakṣe caturdaśī | pūrvaviddhā tu kartavyā paraviddhā na karhicit || ityāpastambokteśca | tatra sarvāsu caturdaśīṣu vīreśvarapūjoktā skānde— vidyāyaiva jāgaraṇaṃ naro vīreśamarcayet | bhūtāyāṃ naiva gṛhṇāti śarīraṃ pāñcabhautikam || caitrakṛṣṇacaturdaśyāṃ kedārakuṇḍodakapānamuktaṃ tatraiva— caitrakṛṣṇacaturdaśyāmupavāsaṃ vidhāya ca | kedārodakapānena yathā tatra phalaṃ labhet || iti | caitraśuklacaturdaśī rātrivyāpinī grāhyeti kecitmadhoḥ śrāvaṇamāsasya yā tu śuklā caturdaśī | sā rātrivyāpinī grāhyā parā pūrvāhṇagāminī || iti baudhāyanavacanāt | niśi bhramanti bhūtāni śaktayaḥ śūlabhṛdyataḥ | atastatra caturdaśyāṃ satyāṃ tatpūjanaṃ bhavet || iti brahmavaivartācca | tātacaraṇāstutṛtīyekādaśī ṣaṣṭhī śuklapakṣe caturdaśī | pūrvaviddhā na kartavyā kartavyā parasaṃyutā || iti | nāradena śuklacaturdaśī paraviddhoktā, kṛṣṇapakṣe'ṣṭamī caiva kṛṣṇapakṣe caturdaśī | pūrvaviddhā tu kartavyā paraviddhā na karhi cit || ityāpastambena ca kṛṣṇā pūrvoktā | aparāhnavyāpitve tūbhe api pūrvaviddhe eva ca, caturdaśī tu kartavyā trayodaśyā yutā vibho | mama bhaktairmahābāho bhavedyā cāparāhrikī || iti | darśaviddhā na kartavyā rākāviddhā kadācana | iti skāndokteḥ | madhoḥ śrāvaṇamāsasyeti baudhāyanīye tu'parāpūrvāhṇagāminītyeva vidhīyate na rātrivyāptā grāhyetyapi | ubhayavidhau vākyabhedaprasaṅgāt | kintu skāndavākyaprāptaṃ pūrvaviddhatvamanūdyate, taddhi rātrivyāptitva eva bhavati | rātrivyāpinīti vidhiḥ, 'pūrvāhṇagāminītyanuvāda iti cenna | madhuśrāvaṇaśuklacaturdaśībhinnānāṃ pūrvāhṇavyāpinīnāṃ grahaṇasyāprāpteḥ | ato lakṣaṇayā rātrivyāpinītyanena pūrvaviddhatvamanūdyate ityāhuḥ | rātrivyāpinītyetatpūrvaviddhāparam | tacca sāyāhnavyāpitve bhavati | pūrvaviddhā ca rātrivyāpinyeva bhavati | evaṃ ca pūrvaviddhatve paraviddhatve vā prāpte madhoḥ śrāvaṇamāsasyeti vaco niyamavidhirbhavati | pūrvaviddhatvābhāve kevalarātrimātravyāpitve tvapūrvavidhitvaṃ syāttacca niyamavidherguruviti śāstrasiddham | sā rātrivyāpinī-