Kalamayukha 4.p11

4.p11

tathā devīpurāṇe— pūjayitvā''śvine māsi viśoko jāyate naraḥ | varṣevarṣe vidhātavyaṃ pūjanaṃ ca visarjanam || iti | yattu govindārṇave devīpurāṇe— śaratkāle mahāpūjā kriyate yā ca vārṣikī | sā kāryodayagāminyāṃ na tithestatra yugmatā || iti tatrodayagāmitvamapi prāyaḥ pūrvāhṇavyāpitva eva bhavatīti na virodhāśaṅkā | yugmatā yugmavākyānurodhena nirṇaya ityarthaḥ | vārṣikītyanena saṃvatsarasyādau caitraśuklapratipadyupakramya navamyantā pūjā'bhidhīyate | tataśca śaradvasantayostulya eva durgotsavaḥ kāryaḥ | yāni tu— yo māṃ pūjayate nityaṃ dvitīyādiguṇānvitām | pratipacchārade jñātvā so'śnute sukhamavyayam || yadi kuryādamāyuktā pratipatsthāpane mama | tasya śāpāyutaṃ datvā bhasmaśeṣaṃ karomyaham || āgrahātkurute yastu kalaśasthāpanaṃ mama | tasya saṃpadvināśaḥ syājjyeṣṭhaḥ putro vinaśyati || tathā— na darśakalyā yuktā pratipaccaṇḍikārcane | udaye dvimuhūrtāpi grāhyā sodayagāminī || yā cā''śvayuji māse syātpratipaddradvayānvitā | śuddhamambārcanaṃ tasyāṃ śatayajñaphalapradam || ityamāyoganiṣedhakāni, yānica— dvitīyāśeṣasaṃyuktā pratipaccaṇḍikārcane | mohādathopadeśādvā kṛtaṃ putravināśakam || ārambhe navarātrasya dvitīyā truṭisaṃyutā | na kevalaṃ tithiṃ hanti vedhātsā putrasaṃpadam || ityādīni dvitīyāyoganiṣedhakāni tānyubhayavidhānyapi sarvāṇi nirmūlāni | samūlatve'pi parasparaṃ saṃpratipakṣatvādanirṇāyakāni | candraprakāśe— prātarāvāhayeddevī prātaḥreva praveśayet | prātaḥ prātaḥśca saṃpūjya prātaḥreva visarjayet || ityuktam | sati saṃbhave pratipadaḥ ādyaṃ nāḍīṣoḍaśakaṃ tyaktvā kalaśaṃ sthāpayet | ādyāḥ ṣoḍaśa nāḍīstu labdhvā yaḥ kurute naraḥ | kalaśasthāpanaṃ tatra tvariṣṭaṃ jāyate dhruvam || iti devīpurāṇavacanāt | kalaśasthāpane vaidhṛtiścitrādiyoganiṣedhakāni vacanāni tāni nirmūlāni | yathā— bhadrāyutā cetpratipattu labhyate viruddhayogairapi saṅgatā satī | saivāparāhne vibudhairvidheyā strīputrarājyādivivṛddhihetuḥ || iti | kalaśasthāpanaṃ tu divaiva kāryam | na rātrau | taduktaṃ mātsye— na rātrau sthāpanaṃ kāryaṃ na ca kuṃbhābhiṣecanam || iti | atra trirātramapyuktaṃ dhaumyena— trirātraṃ cāpi kartavyaṃ saptamyādi yathākramam || iti | atha vistareṇa navarātrakṛtyaṃ devīpurāṇe— kanyāsaṃsthe ravau śakra śuklāmārabhya nandikām | ayācī tvathavaikāśī naktāśī vā'tha vāgyataḥ || prātaḥsnāyī jitadvandvastrikālaṃ śivapūjakaḥ | japahomaṃsadāyuktaḥ kanyakāṃ bhojayenmudā || śivaśca śivā ca śivau tayoḥ pūjakaḥ | nandā ca pratipadeva prathamopasthitatvāt | bhaviṣye— trirātraṃ cāpi kartavyaṃ saptamyādi yathākramam | tatra pratipadi pūrvāhne tilatailena snāto yajamāno gaṇapatiṃ saṃpūjya deśakālau nirdiśya navamīparyantamupavāsādyanyataraniyamopeto durgāpūjanamamamukaphalakāmaḥ kariṣye itiṃ saṃkalpayet | tataḥ kadalīstambhavastrādimaṇḍite gṛhe caturasracaturhastavedikopari sarvatobhadrādimaṇḍalaṃ vidhāya tatra ' mahīdyauḥ ' ityādivaruṇapūjāntaṃ kalaśasthāpanaṃ kuryāt | sauvarṇādipratimāpūjārtham ' pūjyā maṇḍalakumbhasthāḥ ' iti devīpurāṇāt | mṛnmayādikā tu kalaśasya paścādāsane sthāpyā | vedikoṇeṣvapi catvāraḥ kalaśāḥ sthāpyāḥ | caturaḥ kalaśānyastu dadyāddevagṛhe naraḥ | catuḥsamudravalayāṃ sa tu bhuṅkte vasundharām