Kalamayukha 4.p10

4.p10

athāśvinaśuklapratipadi navarātrārambhaḥ | taduktaṃ hemādrau dhaumyena— āśvine śuklapakṣe tu karttavyaṃ navarātrakam | pratipadādikrameṇaiva yāvacca navamī bhavet || tatra pūrvāhnavyāpinī grāhyā— āśvinasya site pakṣe navarātramupoṣitaḥ | susnātastilatailena pūrvāhne pūjayecchivām || iti devīpurāṇe tasya karmakālatokteḥ— karmaṇo yasya yaḥ kālastatkālavyāpinī tithiḥ | ityanena karmakālavyāpinyāmeva karttavyokteḥ | nacātropavāsānurodhena nirṇayaḥ | tasya navarātramupoṣitaḥ pūjayet ityādidevīpurāṇādau 1 nakhāni nikṛntati snāti ityādivatphalasaṃskāratvena pūjāṅgatvāvagamāt | ataḥ pradhānabhūtapūjākālapūrvāhnavyāpitvenaiva nirṇayaḥ | pūjāyāstu prādhānyaṃ phalasaṃbandhāt | sā ca skānde— āśvine māsi meghānte mahiṣāsuramardinīm | devīṃ saṃpūjayitvā ye arddharātre'ṣṭamīṣu ca || krīḍanti vividhairbhogairdevaloke sudurlabhe | nādhayo vyādhayasteṣāṃ na ca śatrubhayaṃ bhavet || iti | kālikāpurāṇe— kṛtvaivaṃ paramāmāyurnirvṛttiṃ tridivaukasaḥ | evamanyairapi sadā devyāḥ kāryaṃ prapūjanam || vibhūtimapulāṃ labdhuṃ caturvargapradāyakam | pūjayedityadhikṛtya bhaviṣyottare'pi— bhavānītuṣṭaye pārtha saṃvatsarasukhāya ca | bhūtapretapiśācānāṃ nāśāya cotsavāya ca || iti | akaraṇe pratyavāyopi kālikāpurāṇe— yo mohādathavālasyāddevīṃ durgāṃ mahotsave | na pūjayati duṣṭātmā dveṣādvāpyatha bhairava || kruddhā bhagavatī tasya kāmāniṣṭāni hanti vai