Kalamayukha 4.p18

4.p18

atha kumārīpūjā | devīpurāṇe | brahmovāca— 'na tathā tuṣyate śakra homadānajapādinā | kumārīpūjanenātra yathā devī prasīdati || atra navarātre | śuklāṣṭamīcaturdaśyornavamyāṃ ca viśeṣataḥ || iti prasaṅgādanyatrāpi tadvidhānam | kumārīpūjane viśeṣo madanaratne skānde— ekaikāṃ pūjayetkanyāmekavṛddhayā tathaiva ca | dviguṇāṃ triguṇāṃ vā'pi pratyekaṃ navakaṃ tu vā || ekavarṣā tu yā kanyā pūjārthaṃ tāṃ vivarjayet | gandhapuṣpaphalādīnāṃ prītistasyā na vidyate || dvivarṣakanyāmārabhya daśavarṣāvadhi kramāt | yathoktalābhe tu devīpurāṇe— vivāhānantaraṃ kanyāṃ kanyātvamupajāyate | tāvatsaṃpūjyate kanyā yāvatpuṣpaṃ na dṛśyate || iti | pūjāmantrastu skānde— mantrākṣaramayīṃ lakṣmīṃ mātṛṇāṃ rūpadhāriṇīm | navadurgātmikāṃ sākṣātkanyāmāvāhayāmyaham || jagatpūjye jagadvandye sarvaśaktisvarūpiṇi | pūjāṃ gṛhāṇa kaumāri jaganmātarnamo'stu te || evamabhyarcanaṃ kuryātkumārīṇāṃ prayatnataḥ | kañcukaiḥ śvetavastraiśca gandhapuṣpākṣatādibhiḥ || nānāvidhairbhakṣyabhojyairbhojayetpāyasādibhiḥ | atrāpūjyakanyāsvarūpamuktaṃ tatraiva— hīnādhikāṅgīṃ kuṣṭhīṃ ca vināṃśikulasaṃbhavām | granthisphuṭitasarvāṅgīṃ raktapūyavraṇāṅkitām || jātyandhāṃ kekarāṃ kāṇīṃ kurūpāṃ tanuromaśām | saṃtyajedrogiṇīṃ kanyāṃ dāsīgarbhasamudbhavām || iti | vināśi saṃtatiśūnyam | granthayaḥ kūrparajānvādayāḥ | tanuścāsau romaśā ceti karmadhārayaḥ | devīgṛhe dīpo ahorātraṃ prajvalanīyāḥ | matsyapurāṇe— gītavāditranirghoṣaṃ devasyāgre ca kārayet | ghaṇṭā bhavedaśaktasya sarvavādyamayī yataḥ || iti | pūjā ca pratyahaṃ trikālaṃ kāryā 'trikālaṃ śivapūjaka' iti pūrvoktadevīpurāṇāt