Kalamayukha 4.p19

4.p19

bilvaśākhāpūjā | jyotiḥśāstre saptamyāṃ bilvaśākhāpūjoktā— āśvinasya site pakṣe sumuhūrtena saptamī | tasyāṃ ca patrikāpūjā karttavyā na(va?ra)nāyakaiḥ || praśastāṃ saphalāṃ bilvaśākhāmāhṛtya pūjayet || iti | atha bodhanaprakāraḥ | tatkālo liṅgapurāṇe— kanyāyāṃ kṛṣṇapakṣe tu pūjayitvārabhedvivā | navamyāṃ bodhayeddevīṃ mahāvibhavavistaraiḥ || bhaviṣye— ṣaṣṭhyāṃ bilvatarau bodhaṃ sāyaṃsandhyāsu kārayet | devīpurāṇe— jyeṣṭhānakṣatrayuktāyāṃ ṣaṣṭhyāṃ bilvābhimantraṇam || ' bilvavṛkṣāyanamaḥ ' iti bilvataruṃ saṃpūjya bilvavṛkṣe jayantītyādi ca durge ihāgacchetyādinā durgāmāvāhya pūjayitvā gītavādyaghoṣapurassaraṃ devīṃ vibodhayet | mantrastu— rāvaṇasya vadhārthāya rāmasyānugrahāya ca | akāle brahmaṇā bodho devyāstvayi kṛtaḥ purā || iṣe māsi site pakṣe navamyāṃ mārgayogataḥ | śrīvṛkṣe bodhayāmi tvāṃ yāvatpūjāṃ karomyaham || iti | ṣaṣṭhyāṃ tu iṣa ityādeḥ sthāne— ahamapyāśvine ṣaṣṭhyāṃ sāyāhne bodhayāmyataḥ || iti | tato bilvavarorāmantraṇam | mantrastu— merumandārakailāsahimavacchikhare girau | jātaḥ śrīphalavṛkṣa tvamambikāyāḥ sadā priyaḥ || śrīśailaśikhare jātaḥ śrīphalaḥ śrīniketana | netavyo'si mayā vṛkṣa pūjyo durgāsvarūpataḥ