Kalamayukha 6.p4

6.p4

vaiśākhaśuklatṛtīyāyāṃ trilocanayātroktā kāśīkhaṇḍerāghavaśuklatṛtīyāyāṃ snātvā paippilake hrade | saṃtarpayetpitṝn devāṃstrilocanamathārcayet || iti | saivā akṣayatṛtīyā | iyamevākṣayatṛtīyocyate | taduktaṃ bhaviṣyeyātveṣā kuru śārdūla vaiśākhe tu mahātithiḥ | tṛtīyā sā'kṣayā loke gīrvāṇairabhivanditā || yatkiñciddīyate dānaṃ svalpaṃ vā yadi vā bahu | tatsarvamakṣayaṃ yasmātteneyamakṣayā smṛtā || iti | iyameva yugādiḥ | sā pūrvāhvavyāpinī grāhyā | taduktaṃ nāradīyedve śukle dve tathā kṛṣṇe yugādī kavayo viduḥ | śukle pūrvāhnike grāhye kṛṣṇe caivāparāhnike || iti | atra viśeṣo govindārṇave devīpurāṇetṛtīyāyāṃ tu vaiśākhe rohiṇyṛkṣe prapūjya ca | udakumbhapradānena śivaloke mahīyate || kalaśadānamantrastueṣa dharmaghaṭo datto brahmaviṣṇuśivātmakaḥ | asya pradānāttṛpyantu pitaro'pi pitāmahāḥ || gandhodakatilairmiśraṃ sānnaṃ kumbhaṃ sadakṣiṇam | pitṛbhyaḥ saṃpradāsyāmi akṣayyamupatiṣṭhatu || iti