Tithyarka 2.p1.37

2.p1.37

iti | tatra vasantartuścaitravaiśākhātmakaḥ, “madhuśca mādhavaśca vāsantikāvṛtū” iti śruteḥ | evaṃ vasantādikṛtukrameṇa mārgaśīrṣapauṣātmako
hemantartuḥ | māghaphālgunātmakaḥ śiśirarttuḥ | sa dvedhā sauraścāndraśceti | tatra sauro viṣṇudharmottare darśitaḥ—
“sauramāsadvaye rāma ! ṛturityabhidhīyate |” iti
cāndrastu bahvṛcaḥ śrutyā darśitaḥ—
“sūryācandramasau prakṛtya viśvānyanyo bhuvanābhicaṣṭa
ṛtūnanyo vidadhajjāyate punaḥ |” iti
atra punarjāyata iti liṅgādanukalpakatvaṃ candrasya pratīyate
anayorviniyogastrikāṇḍamaṇḍane darśitaḥ—
“śrautasmārtakriyāḥ sarvāḥ kuryāccāndramasartuṣu
tadalābhe tu saurarttūṣviti jyotirvidāṃ matam ||” iti
tathā ca hemantaśiśirayoścartuṣvasitapakṣeṣvaṣṭamyaścatasro'pyaṣṭakāḥ
āsu śrāddhamuktaṃ yājñavalkyena—
“amāvāsyāṣṭakāvṛddhiḥ kṛṣṇapakṣo'yanadvayam
dravyaṃ brāhmaṇasampattirviṣuvatsūryasaṃkramaḥ
vyatīpāto gajacchāyā grahaṇaṃ candrasūryayoḥ
śrāddhaṃ prati ruciścaiva śrāddhakālāḥ prakīrttitāḥ ||” iti dik
pauṣaśuklāṣṭamī budhavārayuktā mahābhadretyuktaṃ nirṇayāmṛte bhaviṣyottare—
“puṣye māsi yadā devi ! śuklāṣṭamyāṃ budho bhavet
tadā tu sā mahāpuṇyā mahābhadreti kīrttitā
tasyāṃ snānaṃ japo homastarpaṇaṃ viprabhojanam |”
kāryamiti śeṣaḥ | iyameva bharaṇīyuktā jayantītyuktaṃ tatraiva—
“pauṣe māsi yadā devi ! aṣṭamyāṃ śuklapakṣake
nakṣatraṃ jāyate puṇyaṃ yalloke raudramucyate
tadā tu sā mahāpuṇyā jayantī aṣṭamī śubhā
tasyāṃ snānaṃ tathā dānaṃ japo homaśca tarpaṇam
sarvaṃ koṭiguṇaṃ devi ! kṛtaṃ bhavati kṛtsnaśaḥ |” iti