Tithyarka 6.1.15

6.1.15

“bhāryā patyurvrataṃ kuryād bhāryāyāśca patirvratam
asāmarthye'parastābhyāṃ vratabhaṅgo na jāyate ||”
skānde'pi—
“putraṃ vā vinayopetaṃ bhaginīṃ bhrātaraṃ tathā
eṣāmabhāva evānyaṃ brāhmaṇaṃ viniyojayet ||” iti
parāśaraḥ—
“upavāso vrataṃ homastīrthasnānajapādikam
vipraiḥ sampāditaṃ yasya sampannaṃ tasya tatphalam ||” iti
madanaratne prabhāsakhaṇḍe—
“bhartā putraḥ purodhāśca bhrātā patnī sakhā'pi ca
yātrāyāṃ dharmakāryeṣu jāyante pratihastakāḥ
ebhiḥ kṛtaṃ mahādevi ! svayameva kṛtaṃ bhavet |" iti
"kāmye pratinidhirnāsti nitye naimittike ca saḥ
kāmyeṣūpakramādūrdhvaṃ kecitpratinidhiṃ viduḥ ||" iti
"pūrva vrataṃ gṛhītvā yo nācaretkāmamohitaḥ
jīvan bhavati cāṇḍālo mṛtaḥ śvā cābhijāyate ||”
"krodhātpramādāllobhādvā vratabhaṅgo bhaved yadi
dinatrayaṃ na bhuñjīta maṇḍanaṃ śiraso bhavet ||” iti
"prāyaścittamidaṃ kṛtvā punareva vratī bhavet |”
"kālaḥ sarvo'pi nirdiṣṭaḥ pātraṃ sarvamudāhṛtam
avānnasya pradāne tu nātra kāryā vicāraṇā
tadaiva dānakālaḥ sa yadobhayamupasthitam |”
"nahi kālaṃ pratīkṣeta jalaṃ dātuṃ tṛṣānvite
annodakaṃ sadā deyamityāha bhagavān manuḥ ||" iti
skānde"arddhaprasūtāṃ gāṃ dadyāt kālādi na vicārayet
kālaḥ sa eva grahaṇe yadā vai dvimukhī tu gauḥ ||” iti
vyāsaḥ"āsannamṛtyunā deyā gauḥ savatsā tu pūrvavat
tadabhāve tu gaureva narakoddhāraṇāya vai
tadā yadi na śaknoti dātuṃ vaitaraṇīṃ tu gām
śakto'nyo'ruk tadā dattvā śreyo dadyānmṛtasya ca ||”
vārāhe"vyatīpāto'tha saṃkrāntistathaiva grahaṇaṃ raveḥ
puṇyakālāstathā sarve yadā mṛtyurupasthitaḥ