Tithyarka 6.1.9

6.1.9

aṣṭāviṃśatiraṣṭau vā yathāśakti vidhīyate ||”
homadravyamājyam, "ājyaṃ dravyamanādeśe” ityuktatvāt | mārkaṇḍeyaprārthanā kṛtyacintāmaṇau |—
"mārkaṇḍeya ! mahābhāga ! saptakalpāntajīvana !
āyuriṣṭārthasiddhyarthamasmākaṃ varado bhava ||” iti
tato guḍatilayutaṃ payaḥ pivet | pāne mantraḥ—
"satilaṃ guḍasaṃmiśramañjalyarddhamitaṃ payaḥ
mārkaṇḍeyavaraṃ labdhvā pibāmyāyuṣyahetave ||”
'payaḥ' kṣīram | janmatithau varjyāni uktāni skānde—
"khaṇḍanaṃ nakhakeśānāṃ maithunādhyājameva ca
āmiṣaṃ kalahaṃ hiṃsāṃ varṣavṛddhau vivarjayet ||” iti
idaṃ malamāse na kāryyam, pūrvokta—“spaṣṭamāsaviśeṣākhya” itivacanāt | janmatitheḥ khaṇḍatve sati nirṇayaḥ devīpurāṇe—
"ghasradvaye janmatithiryadā syāt
pūjyā tadā janmabhasaṃyutā ca
asaṃskṛtābhe na dinadvaye'pi
pūjyā parā yā bhavatīha tantram ||" iti
ubhayadine'pi nakṣatrayoge'pi parā, pūrvokta—“yugādyā varṣavṛddhiśca” iti—bhaviṣyavacanāt | iti śrīmadbhāradvājamahādevabhaṭṭātmajadivākaraviracite tithyarke janmatithikṛtyam
atha śrāddhāmāvāsyā niścīyate | sā'parāhṇavyāpinī grāhyā,
“piṇḍānvāhāryakaṃ śrāddhaṃ kṣīṇe rājani śasyate
vāsarasya tṛtīye'ṃśe nātisandhyāsamīpataḥ ||”
“darśaśrāddhaṃ tu yatproktaṃ pārvaṇaṃ tatprakīrtitam
aparāhṇe pitṝṇāṃ ca tatra dānaṃ praśasyate ||”
pekṣaṇāt | pūrvedyurevāparāhvavyāpinī cet, saiva grāhyetyāha mādhavīye hārītaḥ—
“yasyāṃ sandhyāgataḥ somo mṛṇālamiva dṛśyate
aparāhne tu yā tasyāṃ piṇḍānāṃ karaṇaṃ dhruvam ||” iti
yattu kārṣṇājinivacaḥ
“bhūtaviddhāmamāvāsyāṃ mohādajñānato'pi vā