Samvatsaradidhiti 22.1-4.1

22.1-4.1

iti sāvanābdakṛtyam
atha bārhaspatyābdakṛtyam | yadyapi hemādriṇā cāndrasaurasāvanātmakasaṃvatsaratrayamevāṅgīkṛtam | tathāca dīpikāyām—
tryabdī bhamānaṃ vinā iti | tathāpi mādhavena sapramāṇatayā
bārhaspatyanākṣatrayorapi pradarśanānna tadanādaraṇamucitam | udāhṛtaṃ
ca tatpramāṇam | naca tayordharmaśāstre sarvathaivānupayogaḥ | tadupajīvyavidhiniṣedhānāmupalambhāt | tatra bṛhaspateḥ saṃkramaṇāddāsraṃkrāntikālo vārhaspatyo vatsaraḥ | tatkārye skānde dvārakāmāhātmye—tatra kāśī kurukṣetramayodhyā mathurā purīti | bahūni
tīrthānyupakramya—svarge mṛtyau ca pātāle yāni tīrthāni nimnagāḥ | sthitā godāvarītīre siṃharāśigate gurau | kanyāsthe
puṣkarādīni sadā sindhusarāṃsi ca | mervādiparvatāḥ puṇyā darśanātpāpanāśanāḥ | tīrtharājaṃ prayāgaṃ ca sarvatīrthasamanvitam
dvārakāṃ vai samāyānti gomatyāṃ kṛṣṇasaṃnidhau | iti | tataśca
siṃhasthe gurau godāvarīyātrā kartavyā, kanyāsthe dvārakāyātretyullīyate | jyotiṣe-raviṇā saṃyute jīve siṃhasaṃsthe gurau tathā
astaṃ gate tathā śukre bāle vṛddhe tathaiva ca | vrataṃ yātrāṃ vivāhaṃ
ca vidyāṃ pārthivadarśanam | kūpavāpītaḍāgāni devatānāṃ ca
mandiram | devatānāṃ pratiṣṭhāṃ ca bālānāṃ karṇavedhanam| sarvadā naiva
kurvīta karaṇe maraṇaṃ dhruvam | iti | astamityarthe jīve ityanuṣaṅgaḥ
tilagobhūhiraṇyānāṃ saṃdhyopāsanayoḥ kriyā | parvahomaścāgrayaṇaṃ
sāmneriṣṭiśca parvaṇoḥ | nityāgnihotrahomaśca devatātithipūjanam
tarpaṇaṃ ca nimittasya nityatvātsiṃhage gurau | etatkāṭhakagṛhyoktam | paiṭhīnasiḥ-saṃkrāntirahite māsi kuryādāgrayaṇaṃ naveti