Abdadidhiti 7.p26.1

7.p26.1

atha bārhaspatyābdakṛtyam | yadyapi hemādriṇā cāndrasaurasāvanātmakamābdatrayamevāṅgīkṛtam | tathāca dīpikāyām— tryabdī bhamānaṃ vinā iti | tathāpi mādhavena sapramāṇatayā bārhaspatyanākṣatrayorapi pradarśanānna tadanādararaṇamucitam | udāhṛtaṃ ca tatpramāṇam | naca tayordharmaśāstre sarvathaivānupayogaḥ | tadupajīvyavidhiniṣedhānāmupalambhāt | tatra bṛhaspateḥ saṃkramaṇādāsaṃkrāntikālī bārhaspatyo vatsaraḥ | tatkāryaṃ skānde dvārakāmāhātmye—tatra kāśī kurukṣetramayodhyā mathurā purīti | bahūni tīrthānyupakramya—svarge mratyau ca pātāle yāni tīrthāni nimnagāḥ | sthitā godāvarītīre siṃharāśigate gurau | kanyāsthe puṣkarādīni sadā sindhusarāṃsi ca | mervādiparvatāḥ puṇyā darśanātpāpanāśanāḥ | tīrtharājaṃ prayāgaṃ ca sarvatīrthasamanvitam | dvārakāṃ vai samāyānti gomatyāṃ kṛṣṇasaṃnidhau | iti | tataśca siṃhasthe gurau godāvarīyātrā kartavyā, kanyāsthe dvārakāyānnetyunnīyate | jyotiṣe-raviṇā saṃyute jīve siṃhasaṃsthe gurau tathā | astaṃ gate tathā śukre bāle vṛddhe tathaiva ca | vrataṃ yātrāṃ vivāhaṃ ca vidyāṃ pārthivadarśanam | kūpavāpītaḍāgāni devatānāṃ ca mandiram | devatānāṃ pratiṣṭhāṃ ca bālānāṃ karṇavedhanam| sarvadā naiva kurvīta karaṇe maraṇaṃ dhruvam | iti | astamityarthe jīve ityanuṣaṅgaḥ | tilagobhūhiraṇyānāṃ saṃdhyopāsanayoḥ kriyā | parvahomaścāgrayaṇaṃ sāmneriṣṭiśca parvaṇoḥ | nityamagnihotrahomaśca devatātithipūjanam | tarpaṇaṃ ca nimittasya nityatvātsiṃhage gurau | etatkāṭhakagṛhyoktam | paiṭhīnasiḥ-saṃkrāntirahite māsi kuryādāgrayaṇaṃ naveti |