Samvatsaradidhiti 6.p1.19

6.p1.19

śāṃbhavīpūjā |—durgame dustare kārye bhavaduḥkhavināśinīm | pūjayāmi sadā bhaktyā durgāṃ durgārtināśinīm | iti durgāpūjā |—sundarīṃ svarṇavarṇābhāṃ sukhasaubhāgyadāyinīm | subhadrajananīṃ devīṃ subhadrāṃ pūjayāmyaham | iti subhadrāpūjā |—evamabhyarcanaṃ kuryātkumārīṇāṃ prayatnataḥ | kañcukaiścaiva vastraiśca gandhapuṣpākṣatādibhiḥ | nānāvidhairbhakṣyabhojyairbhojayetpāyasādibhiḥ
iti | pratyahaṃ brāhmaṇabhojanaṃ yoginībhojanaṃ coktaṃ nāradīyepratyahaṃ bhojayedviprānkumārīryoginīrapi | iti
atra ca durgāpūjāpāṭhakumārīpūjanādīni dinavṛddhyā kāryāṇi-yadādye divase kuryāccaṇḍikāpūjanādikam | dviguṇaṃ tu
dvitīye'hni triguṇaṃ tatpare'hani | navamītithiparyantaṃ vṛddhyā pūjājapādikam | iti hemādrau devīpurāṇāt-ekottaravivṛddhyā tu
navamīṃ yāvadeva tu | caṇḍīpāṭhaṃ japeccaiva jāpayedvā vidhānataḥ
iti devīpurāṇācca | ekaikottarayā vṛddhyā rūpāṇi parikīrtayet
tathaiva kanyakāvipradvayānāṃ vṛddhiruttamā | iti ḍāmarakalpavacanācca | kāmanāviśeṣeṇa skānde-ekaikāṃ pūjayetkanyāmekavṛddhyā tathaiva ca | dviguṇaṃ vāpi pratyekaṃ navakaṃ navakaṃ tu vā
iti | navabhirlabhate bhūmimaiśvaryaṃ dviguṇena tu | ekavṛddhyā labhetkṣemamekaikaina śriyaṃ labhet | iti
bhavānīsahasranāmapāṭho'pyukto rudrayāmale-tadevopakramya-navarātre'kṛtāhāro dṛḍhabhaktirjitendriyaḥ | caṇḍikāyatane vidvān śuciḥ sanmūrtisaṃnidhau | ekākī tu śatāvṛtaṃ paṭheddhīraśca nirbhayaḥ | sākṣādbhagavatī tasmai prayacchedvīpsitaṃ phalam
iti | pratyahaṃ vedapārāyaṇādi vihitam | nāradīye-vedapārāyaṇādīni svaśaktyā kārayedvratī | iti