Manava Dharmashastra 5.110.4

5.110.4

tasmādadṛṣṭādisaṃbhṛteḥ śuddhāśuddhivacanasya saṃskāravidhitaiva śiṣyate, vidhimūlatvādvidhiśiṣṭaiva | ataḥ śuddhamaśuddho ubhe api śāstrāvaseye | tataḥ aśuddhirapi vācyā |” ucyate | uktaiva tarhi ‘vasā śukramiti’ ( 5 | 135 ) | nṛgrahaṇaṃ ca tatra smṛtyantaradarśanena pradarśanārtham—śvamārjārakharoṣṭraka pikākaviḍvarāhamrāmyakukkuṭākhuśṛgālakravyādāmṛgaśakuntanakhinakulānām | vasādigrahaṇaṃ ca romamāṃsānām | śuddhivacanāccāśuddhānāṃ mūtrādyupahatānāmayaṃ saṃskāraḥ kartavyaḥ, na punarevameva prayujyamānānām | na hi suvarṇādayo bhāvāḥ svarūpeṇāśuddhāḥ, yena prayogakāle śuddhimapekṣeran | athavādṛṣṭārtho dṛṣṭaprayogāśrayaḥ saṃskāro vidhīyate | prāṅmukheneva bhojane | tatra śuddhivacanaṃ virudhyate | ye tu pātrāṇāṃ bhojanārambhe saṃmārjanaprakṣālane, te samācārataḥ, na punarasyāḥ śuddhismṛteḥ | yadapyanyadaspṛśyaṃ puruṣasya patitacāṇḍālādi tathā laśunapalāṇḍusurāmāṃsādi, tadapi dravyāṇāmupaghātakam | tatra kasminnupaghāte kā śuddhiriti smṛtyantarasamācārāvanveṣaṇīyau | uktaśca viśeṣo hārītāpastambaparāśaramunibhiḥ | tāni tu vacanānyasmābhiriha sarvāṇi na parivartitāni, lekhakaviśeṣaprasaṃgāt candragomitantrakāravat |