Dharmapradipa 15.p2.2

15.p2.2

muhūrttamapi saṃyuktā saṃpūrṇā sāṣṭamī bhavet|| kalā kāṣṭhā muhūrttāpi yadā kṛṣṇāṣṭamī tithiḥ| navamyāṃ saiva grāhyā syātsaptamīsaṃyutā nahi||” iti pādmācca | kecittu hemādrāvaṣṭamyāḥ prādhānyāttasyāśca pūrvedyuḥ karmakālavyāpitvātpūrvaiva | pādmaṃ tu pūrvehni niśīthe'ṣṭamyabhāve jñeyam| antarbhāvastu mūrkhadanbhraṇamityāhuḥ| anye tu 'pūrvaviddhāṣṭamī' iti vākye janmāṣṭamīṃ sūryodaye saptamīvedhaniṣedhātkalāghaṭikāmātrāpyaudayikī grāhyā|'kāryā viddhāpi saptamī'iti jayantīparaṃ tatrāpyapavādadvayaṃ bhavatyeva| yadā tu kevalā ṣṭamī śuddhādhikātyāgahetoḥ saptamīvedhasyābhāvānpūrvaiva| yadivā viddhanyūnā tadā paradine grāhyatitherabhāvānpūrvaiva| evaṃ sarvāṇyaudayikavākyāni saptamīvedhaparāṇi | tattvaṃ tu aṣṭamyāḥ karmakālavyāpte, 'divā vā yadi vā rātrau nāsti cedrohiṇī kalā | rātriyuktaṃ prakurvīta' iti pūrvavākyaiḥ rohiṇīyogābhāve grāhyatvoktervacanātkarmakālavyāpinīṃ tyaktvā pūrvā parālpā vā rohiṇīyutā jayantyāṃ grāhyā| mādhavamadanaratnanirṇayāmṛtānantabhaṭṭagauḍamaithilagrantheṣvapyevam | yuktaṃ tūpavāsadvayamatreti vayaṃ brūmaḥ dvayornityatvāt | antyayoḥ paraiva saptamītyādiskāndāt | “muhūrttenāpi saṃyuktā saṃpūrṇā sāṣṭamī bhavet | kiṃ punarnnavamīyuktā kulakoṭyāstu muktidā ||” iti pādmācca | jayantībhedeṣu yadi somabudhavārayogo bhavati tadā phalādhikyam | pāraṇaṃ tu arddharātre'pi tithibhānte'nyatarānte veti mukhyaḥ pakṣaḥ | 'tithiraṣṭaguṇaṃ hanti' ityādibrahmavaivartāt | 'tithyarkṣayoryadā cchedaḥ' ityādi hemādrau vacanācca|