Danakhanda 1.p9

1.p9

saṅkṛtiśca tathātreyaḥ śiṣyebhyo brahma nirguṇam | upadiśya mahātejā gato lokānanuttamān || ambarīṣo gavodattvā brāhmaṇebhyaḥ pratāpavān | arbudāni daśaikāñca sarāṣṭro'bhyapataddivam || sāvitro kuṇḍale divye śarīraṃ janamejayaḥ | ramyamāvasathañcaiva dattvāmuṃ lokamāśritaḥ || brāhmaṇārthe parityajya jagmaturlokamuttamam | sarvveravaṃ vṛṣā darbhā yuvāno'śvāḥ priyāstriyaḥ || ramyamāvasathañcaivadattvāmuṃ lokamāśritaḥ | nimorāṣṭrañca vaideho jāmadagnyo vasundharām || brāhmaṇebhyo dadau cāpi gayaścorvī' sapattanām | avarṣiṇiśca parjjanye sarvvabhūtāni cāsakṛt || rājā mitrasahaścaśca vaśiṣṭhāya mahātmane | madayantīṃ priyāṃ dattvā tayā saha divaṃgataḥ || sahasrajicca rājarṣiḥ prāṇāniṣṭān mahāyaśāḥ | brāhmaṇārthe parityajya gato lokānanuttamān || sarvvakāmaiśca sampūrṇaṃ dattvā veśma hiraṇmayam | mudgalāya gataḥ svargaṃ śatadyumno mahāmatiḥ || nāmnā ca dyutimānāsa śālvarājaḥ pratāpavān | dattvā rājyamṛcīkāya gato lokānanuttamān || madirākhaśca rājarṣirdattvā kanyāṃ sumadhyamām | suvarṇahastāya gato lokān devairabhiṣṭutān || lomapādaśca rājarṣiḥ sa tāṃ dattvā sutāṃ prabhuḥ | ṛṣyaśṛṅgāya vipulaiḥ sarvakāmairayujyata || dattvā śatasahasrantu gavāṃ rājā prasenajit | savatsānāṃ mahātejā gato lokānanuttamān || ete cānye ca bahavo dānena tapasā saha | mahātmāno gatāḥ svargaṃ śiṣṭātmāno jitendriyāḥ || teṣāṃ pratiṣṭhitā kīrttiryāvat sthāsyati medinī | dānayajñaprajāsargaireke hi divamāpnuyuḥ || dānena bhūtā vaśībhavanti dānena vairāṇyapi yānti nāśam | paro'pi bandhutvamupaiti dānāt dānaṃ hi sarvavyasanāni hanti || itiśrīmahārājādhirāja-śrīmahādevasya samastakaraṇādhīśvarasakalavidyā-viśārada-śrīhemādriviracite caturvargacintāmaṇau dānakhaṇḍe dānapraśaṃsāprakaraṇam | dvitīyo'dhyāyaḥ