Smritiprakasha 3.p17

3.p17

kālaḥ, divetyabhyanujñānāt | evaṃ vyavasthite mukhyakālavyāpinītithiryāhyā | madhyāhnavyāpinī grāhyā ekabhakte sadā tithiḥ | iti atra nirṇetavyo viṣayaḥ sor̤hā bhidyate, pūrvedyureva madhyāhnavyāpitvaṃ, paredyureva tadvyāpitvaṃ, ubhayatra tadvyāpitvaṃ, ubhayatra sāmyena tadekadeśavyāpitvaṃ, ubhayatra vaiṣamyeṇa tadekadeśavyāpitvaṃ ceti | tatra prathamadvitīyayormadhyāhnavyāpternirṇāyakatvaṃ, tṛtīye pūrvvaviddhā grāhyā mukhyakālavyāpteḥ samatve'pi gauṇakālavyāpteradhikatvāt | caturthe anenaiva nyāyena mukhyakālavyāpterabhāve'pi gauṇakālavyāptilābhāt pūrvvaviddhaiva, pañcame'pyayamevaṃ nyāyo yojyaḥ | ṣaṣṭhe tu yadā pūrvedyurmadhyāhnaikadeśamadhikaṃ vyāpnoti tadānīṃ tadādhikyāt gauṇakālavyāpteśca pūrvvaiva grāhyā, yadā paredyurmadhyāhnaikadeśamadhikaṃ vyāpnoti tadā gauṇakālavyāptyabhāve'pi mukhyakālavyāptyādhikyānusāreṇa saiva grāhyā | ekabhaktaṃ trividham | svatantramanyāṅgamapavāsapratinidhirūpaṃ ceti | svatantraṃ tūktaṃ, anyāṅgaikabhakte tu pūjāvrateṣu sarvvatra madhyāhnavyāpinī tithiriti, aṅginaḥ pūjāvidheḥ madhyāhne vihitatvena mukhyakālānugrahādaṅgasya ekabhaktasya mukhyakālāsammavena gauṇakālarūpe'parāhne karttavyatvam, kenacit nimittena svatantraikabhakte mukhyakālāsammavena gauṇakālābhyanujñānāt | upavāsapratinidhirūpamekabhaktam upavāsatithau kāryyaṃ, “tithau yatropavāsaḥ syādekabhakte'pi sā smṛte”ti vacanāt, upavāsavrataṃ prakramya rogādinā tadaśaktau gurbbanūjñayā tasya ekabhaktasya sambhāvitatvāt