Abdadidhiti 2.p12

2.p12

asyāmeva paurṇamāsyāṃ rakṣābandho madanaratne-kṛṣṇa uvāca | saṃprāpte śravaṇasyānte paurṇamāsyāṃ dinodaye | snānaṃ kurvīta matimānśrutismṛtividhānataḥ | tato devānpitṝṃścaiva tarpayetparamāmbhasā | upākarmādikaṃ kṛtvā ṛṣīṇāṃ tarpaṇaṃ tathā | kurvīta brāhmaṇaiḥ sārdhaṃ vedānuddiśya bhaktitaḥ | śūdrāṇāṃ mantrarahitaṃ snānaṃ dānaṃ ca śasyate | tato'parāhnasamaye kuryātpoṭalikāṃ śubhām | kārayeccākṣataistadvatsiddhārthairhemacarcitām | vastrairvicitraiḥ kārpāsaiḥ kṣaumairvā malavarjitaiḥ | vicitratantugrathitāṃ sthāpayedbhājanopari | kāryā gṛhasya rakṣā gomayaracitaiḥ suvṛttakuṇḍalakaiḥ | dūrvāparṇaiḥ sahitairniyataṃ duritopaśamanāya | upalipte gṛhamadhye vṛttacatuṣke nyasetkumbham | pīṭha dattvopaviśedrājāmātyairyutaśca sumuhūrte | veśyājananena sahito maṅgalaśabdaiḥ samutthitaiścihnaḥ | rakṣābandhaḥ kāryaḥ śāntidhvaninā narendrasya | devadvijātiśastrāṇyastrāṇi rakṣābhirarcayetprathamam | tadanu purodhā nṛpate rakṣāṃ badhnīta mantreṇa | yena baddho balī rājā dānavendro mahābalaḥ | tena tvāmapi badhnāmi rakṣe mā cala mā cala | iti | brāhmaṇaiḥ kṣatriyairvaiśyaiḥ śūdraiścānyaiśca mānavaiḥ| kartavyo rakṣikābandho dvijānsaṃpūjya bhaktitaḥ | anena vidhinā yastu rakṣābandhanamācaret | sa sarvadoṣarahitaḥ sukhī saṃvatsaraṃ vaset | iti | asminkarmaṇyaudayikī tithirgrāhyā | paurṇamāsyāṃ dinodaye ityupakramāt | upākarmopalakṣitottarakālatāpratīteśca | idaṃ karma bhadrāyāṃ na kartavyam | bhadrāyāṃ dve na kartavye śrāvaṇī phālgunī tathā | śrāvaṇī nṛpatiṃ hanti grāmaṃ hanti ca phālgunī| iti vacanena śrāvaṇīpadasya tatra kartavyarakṣābandhaviṣayatvena nibandhṛbhirvyākhyānāt | iti rakṣābandhavidhiḥ