Abdadidhiti 2.p14

2.p14

atha prayogaḥ | atra prathamaprayoge prātaḥ svastivācanaṃ vṛddhiśrāddhaṃ ca kuryāt | tataḥ kāryaṃ kārikāyāṃ-pūrayeddhi kalaśaṃ ‘navaṃ yāvakasaktubhiḥ | vidhāya tannave śikye darvīṃ vaikaṅkatīmapi | prācyāṃ diśi śuciṃ deśaṃ balyarthaṃ parigṛhya ca | yavadhānā vibhajyaikaṃ bhāgamabhyajya sarpiṣā | iti | pātrāntare anaktā dhānā nidadhyāditi śeṣaḥ | sarpiṣeti asaṃskṛtājyenetyarthaḥ | yavaivrīhibhirvā saktūnkārayitveti jayantaḥ | śaunakaḥ-nave śikye nidhāyaiva śikyaṃ kvāpi niveśayet | dhānāścākhaṇḍitākārāḥ saṃpādyāḥ prasthamātrikāḥ | iti | astamite aupāsanaṃ hutvā prāṇānāyamya deśakālau saṃkīrtya mama putrapautrādīnāṃ roganivāraṇasamastapāpakṣayadvārā śrīparameśvaraprītyarthaṃ śravaṇākarma kariṣye iti saṃkalpya anvādhānādicakṣuṣī ājyenetyante agniṃ caturvāraṃ caruṇā acyutaṃ bhaumaṃ puroḍāśena agnimāśāya‍ājyena vājino dhānābhiḥ śeṣeṇa sviṣṭakṛtamityādi | pātrāsādane sthālīṃ kapālaṃ śarāvatrayaṃ upaveṣamiti dakṣiṇena hastena savyena prokṣaṇīṃ cāsādya | darvyādi prakṛtivat | darvyā saha bhuvi nyubjapātrāsādanam | prokṣaṇakāle'nyena puruṣeṇa prokṣaṇaṃ puroḍāśahomakāle kārikāyāṃ tatsūcanāt | ulūkhalamusale dṛṣadupale śūrpe kṛṣṇājinaṃ madantīṃ darbhośceti-purovadavaghātādi syādvibhajya ca taṇḍulān | tatraikena puroḍāśamanyena śrapayeccarum | iti kārikāyāṃ vibhāgavidhibalenaikaśūrpa eva dvayornirvāpapratīteḥ | jayantastvāha kecitpṛthageva nirvāpaṃ kurvantīti | śaunako'pi-puroḍāśārthamanyasminkṛtvā nirvapaṇaṃ pṛthak | iti | tadā śūrpayorāsādanam | pūrṇapātranidhānānte carvarthaṃ puroḍāśārthaṃ ca tūṣṇīṃ caturaścaturo muṣṭīnnirupya tathaiva prokṣaṇam | kārikāyāṃ-havirdvayasya tūṣṇīṃ tu nirvāpaprokṣaṇe iha | iti vacanāt pṛthaṅniruptān pṛthagavahṛtya sahaniruptāṃstu sahaivāvahatya taṇḍulāndvidhā vibhajya puroḍāśīyānsvayaṃ kiṃcitpiṣṭīkṛtya kṛṣṇājine praskandya patnyā piṣṭaṃ kārayitvā sthālīmagnāvadhiśritya paristaraṇātpaścāddvāvaṅgārau pṛthakkṛtya tayorekaṃ vāyavyadeśe nirasyāpa upaspṛśya śiṣṭamaṅgāramavasthāpya tasminkapālaṃ nidhāya tatrānyamaṅgāraṃ nikṣipya pātrāntareṇa piṣṭārthamapaḥ pratāpya prakṣālitamekaśarāvamagnau pratāpya svāgre nihite sapavitre