Abdadidhiti 2.p44

2.p44

pārvatyuvāca | na jānāsi vimūḍhā tvaṃ yoginaṃ śūlapāṇinam | yasyājñāsākṣiko viṣṇustrilokīṃ pāti nānyadṛk 43 rājasena svarūpeṇa brahmā sṛṣṭiṃ vidhāsyati | tāmasena svarūpeṇa rudrotti sakalaṃ ruṣā 44 guṇātītasya vai śaṃbhoḥ ko vetti mahatīṃ śubhām | yasyājñā kamaṭho bhūtvā viṣṇuḥ pṛthvīṃ dadhāra vai 45 punaḥ sa sūkaro bhūtvā tāṃ ca dante dadhāra ha | bhuṅkte bhogānyadattānviṣṇurbhogīti vakṣyasi 46 sahasrakamalaiḥ pūrvaṃ viṣṇunārādhitaḥ śivaḥ | vaikuṇṭhaṃ svaśriyastejastena dattaṃ nijaṃ kṣaṇāt 47 indrādīnāṃ tu yo dātā sa devo na śrutastvayā | yaddattaṃ devarājyaṃ tu indro bhuṃkte yathāsukham 48 kubereṇāpi mahatī śrīravāptā varānane | varuṇena jaleśatvaṃ śeṣaḥ pātālasaṃbhavam 49 sūryastapati yadbhītyā vāyurvāti divāniśam | yamaḥ saṃyaminīśatvaṃ taṃ devaṃ kiṃ na vetsyasi 50 yasyājñayā svakāle'pi meghā varṣanti sarvataḥ | pāvakaḥ sarvadevāṃnāṃ vadanaṃ savitānaghe 51 pitaraḥ pitṛlokatvaṃ matpitā parvateśatām | candro uḍugaṇeśatvaṃ samudro vai gaṃbhīratām 52 somaḥ prāpauṣadhīśatvaṃ candanaśca sugandhatām | yasyājñayā ca kāle vai vartante vaśavartinaḥ 53 vṛṣṭiḥ śītaṃ ca gharmaśca svasvakāle nirantaram | śakrādayaśca dikpālāḥ svadiśaṃ pālayanti te 54 yeṣu kṛtyeṣu ye devā yojitāsteṣu tatparāḥ | anyathākaraṇe teṣāṃ sa ca daṇḍaṃ vidhāsyati 55 parātparaḥ sa vai devo nirguṇaḥ saguṇo'pi saḥ | nirākāraśca sākāro'yogī yogī sa eva hi 56 kevalo nirguṇaḥ sākṣī kṣaraścākṣara eva saḥ | ko veda tasya tadrūpaṃ yadrūhyeti pracakṣate 57 brahmādyā devatāḥ sarvā ṛṣayaśca tapodhanāḥ | yogino jñānaniṣṭhā ye yadarthe tyaktabāndhavāḥ 58 te'pi tasya na jānanti svarūpaṃ sakhi śūlinaḥ | atastaṃ kāmaye nūnaṃ vidhināhaṃ patiṃ śubhe 59 sakhyuvāca | samyakkāmo'bhilaṣitastadarthe tyaktajīvitā | yatra vai niścitā buddhiḥ sa kāmo bhavati dhruvam 60 mamāpi ca mahadbhāgyaṃ yatastvatkarmakārikā | kiṃcidvijñātumicchāmi yadi tvaṃ śrūyase vacaḥ 61 ambikāpūjanaṃ kāryaṃ yanmayā kāmadaṃ śrutam | taveṣṭakartrī yā devī sāpi pūjyā prayatnataḥ 62 mayi cānugraho devi yadi prītiranuttamā | anujñādānamātreṇa janiḥ saphalatāṃ gatā 63 kariṣyāmyahamapyetadgauryā yatpūjanaṃ śubham | pitā yanna na jānāti vraja tvaṃ tadvanaṃ mahat 64 īśvara uvāca | ityevaṃ saṃmataṃ kṛtvā nītā śīghraṃ mahadvanam | pitā vilokayāmāsa himavāṃstu gṛhe gṛhe 65 kiṃ vā nītā tu me putrī devadānavakinnaraiḥ | satyaṃ kṛtaṃ mayā pūrvaṃ kiṃ dāsye garuḍadhvaje 66 ityevaṃ cintayāviṣṭo mūrcchitaḥ patito bhuvi | hāhākṛtāstato lokāḥ pradhāvanti giriṃ prati | mūrcchāṃ prāptā tvayā kasmātkathayasveti te'bruvan 67 himavānuvāca | kasyedaṃ ceṣṭitaṃ krūraṃ kanyāratnaṃ hṛtaṃ mama | daṣṭā vā kālasarpeṇa siṃhavyāghreṇa vā hatā 68 na jāne kva gatā putrī kena duṣṭena vā hṛtā | cakampe śokasaṃtapto vāteneva yathā taruḥ 69 tvaṃ gatāsi vanaṃ ghoraṃ nirjanaṃ bhayavardhanam | vyāghrasiṃhagajakroṣṭumṛgapakṣimaṇākulam 70 giriścacāra putrīṃ tvāmanviṣyannirjane vane | tasminghore vane tvaṃ tu sakhibhiḥ saha saṃsthitā 71 dṛṣṭvā tatra nadīṃ ramyāṃ tasyāstīre sumadhyamā | upaviṣṭālibhiḥ sārdhamannāhāravivarjitā 72 bālukāyāḥ kṛtāṃ mūrtiṃ śivāyāḥ śaṃkarasya ca | bhādraśuklatṛtīyāyāmarcayantī sumadhyamā 73 tatra vāditragītena rātrau jāgaraṇaṃ kṛtam | tena vrataprabhāveṇa āsanaṃ calitaṃ mama 74 saṃprāpto devi tatrāhaṃ yatra tvaṃ sakhibhiḥ saha | prasanno'smi mayā proktaṃ varaṃ brūhi varānane 75 pārvatyuvāca | yadi deva prasannosi bhartā bhavatu me haraḥ | ityuvāca prasannātmā'jānantī svayamāgatam 76 tathetyuktvā mayā devi kailāsaṃ punarāgataḥ | tataḥ prabhāte vimale nadyāṃ sarvaṃ visṛjya tat 77 pāraṇaṃ te kṛtaṃ tatra yadbhūtaṃ vanagocare | tvaṃ tatra ca prasuptāsi sakhyā sārdhaṃ varānane 78 himavānapi taṃ deśamājagāma mahāvanam | tvāmapaśyannaśrutāṃdikṣu pānabhojanavarjitaḥ 79 dṛṣṭvā tatra nadītīre prasuptaṃ kanyākādvayam | utthāpyotsaṅgamānīya rodanaṃ ca cakāra saḥ 80 siṃhavyāghramṛgairjuṣṭaṃ kimarthaṃ vanamāgatā 81 pārvatyuvāca | mayā vicārito bhartā mahādevaḥ sadāśivaḥ | tadanyathā kṛtaṃ tāta tenāhaṃ vanamāgatā 82 tathetyuktvā himavatā tvamānītā gṛhaṃ prati | tataḥ prayuktā te pitrā mama vaivāhikī kriyā