Samvatsaradidhiti 3.16.p1.3

3.16.p1.3

yasyājñā kamaṭho bhūtvā viṣṇuḥ pṛthvīṃ dadhāra vai 45 punaḥ sa sūkaro bhūtvā tāṃ ca dante dadhāra ha | bhunakti bhogānyadattānviṣṇubhogīti vakṣyasi 46 sahasrakamalaiḥ pūrvaṃ viṣṇunārādhitaḥ śivaḥ
vaikuṇṭhaṃ svaśriyastejastena dattaṃ nijaṃ kṣaṇāt 47 indrādīnāṃ
tu yo dātā sa devo na śrutastvayā | yaddattaṃ devarājyaṃ tu indro
bhuṃkte yathāsukham 48 kubereṇāpi mahatī śrīravāptā varānane
varuṇena jaleśatvaṃ śeṣaḥ pātālasaṃbhavam 49 sūryastapati yadbhītyā
vāyurvāti divāniśam | yamaḥ saṃyaminīśatvaṃ taṃ devaṃ kiṃ na
vetsyasi 50 yasyājñayā svakāle'pi meghā varṣanti sarvataḥ
pāvakaḥ sarvadevānāṃ vadanaṃ bhavitānaghe 51 pitaraḥ pitṛlokatvaṃ
matpitā parvateśatām | candro huḍugaṇeśatvaṃ samudro vai gabhīratām 52 somaḥ prāptauṣadhīśatvaṃ candanaśca sugandhatām | yasyājñayā ca kāle vai vartante vaśavartinaḥ 53 vṛṣṭiḥ śītaṃ ca gharmaśca
svasvakāle nirantaram | śakrādayaśca dikpālāḥ svadiśaṃ pālayanti te 54 yeṣu kṛtyeṣu ye devā yojitāsteṣu tatparāḥ | anyathākaraṇe teṣāṃ sa ca daṇḍaṃ vidhāsyati 55 parātparaḥ sa vai devo
nirguṇaḥ saguṇo'pi saḥ| nirākāraśca sākāro'yogī yogī sa eva
hi 56 kevalo nirguṇaḥ sākṣī kṣaraścākṣara eva saḥ | ko veda
tasya tadrūpaṃ yadbrahmeti pracakṣate 57 brahmādyā devatāḥ sarvā ṛṣayaśca tapodhanāḥ | yogino jñānaniṣṭhā ye yadarthaṃ tyaktabāndhavāḥ 58
te'pi tasya na jānanti svarūpaṃ sakhi śūlinaḥ| atastaṃ kāmaye nūnaṃ
vidhināhaṃ patiṃ śubhe 59 sakhyuvāca | samyakkāmo'bhilaṣitastadarthe
tyaktajīvitā | yatra vai niścitā buddhiḥ sa kāmo bhavati dhruvam 60