Abdadidhiti 2.p63

2.p63

madanaratne bhaviṣye tvanyat dūrvāvratamuktam-aṣṭamyāṃ phalapuṣpaiśca kharjūrairnārikelakaiḥ | drākṣāmalakapiṇḍaiśca badarairlakucaistathā | nāriṅgairairjambukairāmrairbījapūraiśca dāḍimaiḥ | dadhyakṣataiḥ srajobhiśca dhūpainnaivedyadīpakaiḥ | mantreṇānena rājendra śṛṇuṣvāvahito mama | tvaṃ dūrve'mṛtajanmāsi dehi tvamajarāmaram | dattvā piṣṭāni viprebhyaḥ phalāni vividhāni ca | tilapiṣṭakagodhūmadhānyapiṇḍāni pāṇḍava | bhojayitvā suhṛnmitrasaṃbaṃdhisvajanāṃstathā | tato bhuñjīta taccheṣaṃ svayaṃ śraddhāsamanvitaḥ | iti | idaṃca kevaladūrvāpūjanātmakaṃ vrataṃ strīṇāmeva nityam | yā na pūjayate dūrvāṃ mohādiha yathāvidhi | trīṇi janmāni vaidhavyaṃ labhate nātra saṃśayaḥ | tasmātsaṃpūjanīyā sā prativarṣaṃ vadhūjanaiḥ | sukhasantānajananī bhartuḥ saukhyakarī sadā | iti madanaratne purāṇasamuccaye'karaṇe doṣasya vīpsāyāśca śravaṇāt | idaṃ vrataṃ rohiṇasaṃjñakadinanavamamuhūrtavyāpinyāṃ jyeṣṭhā mūlavivarjitāyāmaṣṭamyāṃ kāryam | muhūrte rauhiṇe'ṣṭamyāṃ pūrvā vā yadi vā parā | dūrvāṣṭamī tu sā jñeyā jyeṣṭhāmūlaṃ vivarjayet | iti vacanāt | atra ca jyeṣṭhā mūlavivarjitāyāḥ paradina eva rauhiṇavyāptau parā grāhyā | dinadvaye tadvyāptitadavyāptyoḥ pūrvadine ca jyeṣṭhāmūlayutāyāṃ paraiva grāhyā | dinadvaye'pi niṣiddhayogarahitāyāstadvyāptau tadavyāptau tadekadeśavyāptau ca pūrvaiva grāhyetyabhipretam | śrāvaṇī durganavamī dūrvā caiva hutāśanī | 20 smṛ0 kau0 iti vākye dūrvāṣṭamīyāḥ pūrvaviddhāniyamāt | yadā tu pūrvadine rauhiṇyavyāpinyapi niṣiddhanakṣatrayoginī paradine tādṛśanakṣatrayogarahitāpi rauhiṇasaṃsparśinī tadā yāṃ tithiṃ samanuprāpyetyādi āpādya sākalyamādāya paradina eva rauhiṇamuhūrte etadvrataṃ strībhiranuṣṭheyam | aindrarkṣe pūjitā dūrvā hantyapatyāni nānyathā | bharturāyurharī mūle tasmāttāṃ parivarjayet | iti niṣedhasya gaurīvrate dvitīyāvedhānulaṅghyatvāt | tathā kanyārke'gastyodaye ca nedaṃ vrataṃ strībhiḥ kāryam | śuklā bhādrapade māsi dūrvāsaṃjñā tathāṣṭamī | siṃhārka eva kartavyā na kanyārke kadācana | siṃhasthe sottamā sūrye'nudite munisattama | iti madanaratne skāndāt | ataeva śukle agastyodaye bhāvini saṃnihitatatpūrvakṛṣṇāṣṭamyāmetadvrataṃ kāryamiti hemādriprabhṛtayaḥ | aniṣiddhakālasya sarvathaivālābhe niṣiddhakālepi strībhirvratānukalpo'nuṣṭheyaḥ | kartavyā caikabhaktena jyeṣṭhāmūlaṃ yadā bhavet | dūrvāmabhyarcayedbhaktyā na vandhyaṃ divasaṃ nayet | iti vacanāt | jyeṣṭhāmūlagrahaṇaṃ sakalaniṣiddhakālopalakṣaṇaṃ iti madanaratnakāraḥ | ekabhakteneti niṣiddhakāle'nukalpatvenāgnipakvabhojanavidhānādaniṣiddhakāle strīkartṛtvepi dūrvāvrate brāhmaṇebhyaḥ piṣṭakādidānāntaramagnyapakvabhojananiyamasiddhirityuktaṃ nirṇayāmṛte | dūrvāmabhyarcayedityanantarodāhṛte vacane cāntarṇīto ṇyarthaḥ | tataśca brāhmaṇadvārā pūjāṃ kṛtvā svayamekabhaktaṃ kuryāditi madanaratnakāraḥ | bhādrasyādhimāsatve tatraivedaṃ vrataṃ kāryam | adhimāse tu saṃprāpte nabhasye tūdaye muneḥ | arvāgdūrvāvrataṃ kāryaṃ parato naiva kutracit | iti nirṇayadīpe skāndāt | iti dūrvāvratam