Abdadidhiti 3.p33

3.p33

gehegehe bhaktiparairgrāmegrāme banevane | snātaiḥ pramuditairhṛṣṭairbrāhmaṇaiḥ kṣatriyairnṛpaiḥ | vaiśyaiḥ śūdrairbhaktiyuktaimlecchairanyaiśca mānavaiḥ | strībhiśca kuruśārdūla tadvidhānamidaṃ śṛṇu | iti | nanu nātra strīśūdrāṇāmadhikāraḥ saṃgacchate natarāṃ mlecchānām | laiṅge—śāradī yā mahāpūjā catuḥkarmamayī śubhā | iti mnāpanapūjanabalidānahomarūpacatuḥkarmātmakatvena pūjāyā nirdeśāt , teṣāṃ ca karmaṇāṃ tattatpaurāṇikamantrasādhyatvāt,—śrāvayeccaturo varṇānkṛtvā brāhmaṇamagrataḥ | iti śūdrasya śravaṇamātravidhānena paurāṇikamantroccāraṇe'dhikārābhāvāt | ataeva sahasranāmabhāṣye śūdraḥ sukhamavāpnuyādityetadvyākhyānāvasare śaṃkarācāryairuktaṃ śūdrasya śravaṇādeva phalanirdeśo natu pāṭhāditi satyam | ata eva skānde bhaviṣye ca trividhā pūjā'bhihitā—śāradī caṇḍikāpūjā trividhā parigīyate | sāttvikī japayajñaiścanaivedyaiśca nirāmiṣaiḥ | māhātmyaṃ bhagavatyāśca purāṇādiṣu kīrtitam | pāṭhastasya japaḥ prokto paṭheddevīmanāstathā | rājasī balidānena naivedyaiḥ sāmiṣaistathā | surāmāṃsādyupāhārairjapayajñairvinā tu yā | vinā mantraistāmasī syātkirātānāṃ ca saṃmatā | brāhmaṇaiḥ kṣatriyairvaiśyaiḥ śūdrairanyaiśca mānavaiḥ | evaṃ nānāmlecchagaṇaiḥ pūjyate sarvadasyubhiḥ | iti | atra sāttvikapūjāvidhānaṃ brāhmaṇaviṣayam | nirāmiṣairityatrāmiṣagrahaṇaṃ rudhirapaśuhiṃsopalakṣaṇārtham | ata eva rājasyāṃ balidānagrahaṇaṃ tāmasyāṃ surādigrahaṇaṃ ca saṃgacchate | uktaṃca spaṣṭameva kālikāpurāṇe—svagātrarudhiraṃ dattvā brahmahatyāmavāpnuyāt | madyaṃ dattvā brāhmaṇastu brāhmaṇyādeva hīyate | iti | ataeva madyamapeya madeyamanigrāhyamityuśanovacanamapi brāhmaṇaviṣayatvenaiva saṅgacchate | rājasī balidānena naivedyaiḥ sāmiṣaistathā | iti ślokaiārdhavihitarājasyāṃ tu kṣatriyaśūdrādīnāmadhikāraḥ | atrāpi japayajñaiścairityanuṣaṅgaḥ | āmiṣagrahaṇaṃ ca rudhirādyupalakṣaṇārtham | kṣatriyavaiśyayoḥ brāhmaṇavajjapayajñādhikārasaṃbhavāt | saṃdarśanārthamambāyā devīsūktaṃ paraṃ japan | iti mārkaṇḍeyapurāṇe vaiśyakartṛkajapayajñānuvādadarśanācca, dadatustau baliṃ caiva nijagātrāsṛgukṣitam | iti rājavaiśyakartṛkasya svagātrarudhiradānasyeti tatraiva kathanācca | evaṃ ca trayāṇāṃ varṇānāṃ japayajñādhikāre sati śaktāḥ svayaṃ kuryuraśaktā brāhmaṇadvārā vā kārayeyuḥ | śūdrastu japādi brāhmaṇadvāreva kārayet | — amantrasya tu śūdrasya vipro mantreṇa gṛhyate | iti śūlapāṇyādyudāhṛtavacanena samantrake karmaṇi brāhmaṇadvāreva śūdrasyādhikāraniyamāt | yadi tu kvacitpurāṇe śūdro'nena mantreṇa pūjāṃ kuryādbaliṃ dadyāditi vaco dṛśyate tadā niṣādasthapatinyāyena tāvanmantroccāraṇaṃ tasyāpi bhavatyeva | tāmasīvidhāvapi māṃsādītyādinā balidānasyāpi saṃgrahaḥ | japayajñairiti dvandve yajñagrahaṇaṃ homābhiprāyam | kirātagrahaṇaṃ ca mlecchamātropalakṣaṇārtham | kirātahūṇāndhrakhasā iti purāṇe teṣāṃ sāhacaryadarśanāt , uktavākye'pi antyasthānanirdiṣṭāyāṃ tāmasyāmadhikārikathanārthaṃ sarvānte — evaṃ nānāmlecchagaṇaiḥ pūjyate sarvadasyubhiḥ | iti kathanācca | ato mlecchādīnāṃ na śūdravadbrāhmaṇadvārāpi jape home samantrakapūjāyāṃ vādhikāraḥ kiṃtu taistattadupacārāṇāṃ surādyupahārasahitānāṃ paścādivileśca manasotsargamātraṃ devīmuddiśya vidheyamiti siddham