Abdadidhiti 3.p34

3.p34

atha navarātravratāśaktādhikārikā anukalpā ucyante | bhaviṣye—āśvine māsi śukle tu kartavyaṃ navarātrakam | pratipadādi krameṇaiva yāvacca navamī bhavet | trirātraṃ vāpi kartavyaṃ saptamyādi yathākramam | iti | tathā dvirātrapakṣo'pi—aṣṭamyāṃ ca navamyāṃ ca janmamokṣapradāṃ śivām | pūjayitvāśvine māsi viśoko jāyate naraḥ | iti | pakṣāntarāṇyapyāha dhaumyaḥ—athavā navarātraṃ ca sapta pañca trikādi vā | ekabhāvena naktenāyācitopoṣitaiḥ kramāt | iti | atra saptarātrapakṣe tṛtīyāyāmārambhaḥ | pañcarātrapakṣe pañcamyām | tatra prakāraviśeṣaḥ śāstrāntare— ekabhaktastu pañcamyāṃ ṣaṣṭhyāṃ naktaṃ pravarttayet | ayācitastu saptamyāmaṣṭamyāṃ samupoṣitaḥ | navamyāṃ pāraṇaṃ kuryātpañcarātramitīritam | iti | trikādītyādiśabdokta ekarātrapakṣo dvividhaḥ kevalāṣṭamyāṃ kevalanavamyāṃ veti | ādya ukto brāhme—tatrāṣṭamyāṃ bhadrakālī dakṣayajñavināśinī | prādurbhūtā mahāghorā yoginīkoṭibhiḥ saha | ato'rthaṃ pūjanīyā sā tasminnahani mānavaiḥ | upoṣitairdhūpadīpairvastramālyānulepanaiḥ | atropavāse putravatparyudāsa uktaḥ kālikāpurāṇe-upavāsaṃ mahāaṣṭamyāṃ putravānna samācaret | yathā tathaiva pūtātmā vrate devī visarjayet | iti | vrate samāpte iti śeṣaḥ | kevalanavamīpakṣo bhaviṣyapurāṇe-labdhābhiṣekā varadā śukle cāśvayujasya ca | tasmātsā tatra saṃpūjyā navamyāṃ caṇḍikā budhaiḥ | iti | purāṇāntare tāmeva navamīṃ prakṛtya-tasmādiyaṃ mahāpuṇyā navamī pāpanāśinī | upodhyā tu prayatnena satataṃ sarvapārthivaiḥ | iti | pārthivagrahaṇaṃ navarātrāśaktamātropalakṣaṇārtham | navamyāṃ tu navamyāṃ tu devadānavarākṣasaiḥ | gandharvairuragairyakṣaiḥ pūjyate kinnarairapi | iti bhaviṣyottaravacasyupavāsaśeṣibhūtāyāḥ pūjāyāḥ kevalanavamyāṃ sarvādhikāratvena vidhānāt | keciduktapakṣavatṣaṣṭhyādikalpo'pyanukalpaḥ-bodhayedvilvaśākhāyāṃ ṣaṣṭhyāṃ devīṃ phaleṣu ca | saptamyāṃ bilvaśākhāṃ ca tāmāhṛtya prapūjayet | punaḥ pūjāṃ tathāṣṭamyāṃ viśeṣeṇa samācaret | jāgaraṃ ca svayaṃ kuryādvalidānaṃ mahāniśi | prabhūtabalidānaṃ ca navamyāṃ vidhivaccaret | dhyāyeddaśabhujāṃ devīṃ durgāṃ tantreṇa pūjayet | visarjanaṃ daśamyāṃ tu kuryādvai śāradotsavaiḥ | dhūlikardamanikṣepaiḥ krīḍākautukamaṅgalaiḥ | bhagaliṅgābhidhānaiśca bhagaliṅgapragītakaiḥ | iti kālikāpurāṇādityāhuḥ | tadasat | atrānukalpadyotakavāśabdādyabhāve'nārabdhanavarātravrataṃ pratyeva kumāryāmiva patrikāyāmapi pūjāvidhipratīteḥ | svasyāśaktau anyadvārāpi pūjā kāraṇīyā |-svayaṃ vāpyanyato vāpi pūjayetpūjayīta vā | iti devīpurāṇāt | atra vistṛtapūjāyāmaśaktaṃ prati saṃkṣiptapūjāvidhiḥ kālikāpurāṇe-samyakkalpoditāṃ pūjāṃ yadi kartuṃ na śaknuyāt | upacārāṃstathā dātuṃ pañcaitānṃvitarettadā | gandhaṃ puṣpaṃ ca dhūpaṃ ca dīpaṃ naivedyameva ca | abhāve toyapuṣpābhyāṃ tadabhāve tu bhaktitaḥ | saṃkṣepapūjā kathitā tathā vastrādikaṃ punaḥ | iti | ityanukalpavidhiḥ