Abdadidhiti 3.p52

3.p52

atha saptamyādidinatrayavihitaṃ patrikāpūjanam—tatra saptamyāditithaya udayagāminya eva grāhyāḥ | bhagavatyāḥ praveśādi visargāntāśca yāḥ kriyāḥ | tithāvudayagāminyāṃ sarvāstāḥ kārayedbudhaḥ | iti nandipurāṇāt—prātarāvāhayeddevīmityādi pūrvoktavacobhyaśca | tatraiva mūlādinakṣatrayogena prāśastyaṃ natu tadanurodhena pūrvaviddhāyāṃ tadanuṣṭhānam |-ṛkṣayogānurodhena rātrau patrīpraveśanam | visarge vācaredyastu sarāṣṭraḥ sa vinaśyati | iti niṣedhāt | tadaṅgaṃ ca bilvaśākhāyāṃ devībodhamāśvinakṛṣṇanavamyāmārdrarkṣayutāyāṃ kevalāyāṃ vā kāryam | -kanyāyāṃ kṛṣṇapakṣe tu pūjayitvā'rdrabhe divā | navamyāṃ bodhayeddevīṃ mahāvibhavavistaraiḥ | iti laiṅgāt | atra divetyukteḥ pūrvāhnavyāpinī navamī grāhyā | ubhayatra tatsaṃbandhasāmye tu nakṣatrayoga eva grāhyatvaniyāmakaḥ | navamyāṃ bodhākaraṇe tu yasyāṃ saptamyāṃ patrikāpraveśanaṃ cikīrṣitaṃ tadavyavahitapūrvadine sāyāhnavyāpinyāṃ jyeṣṭharkṣasahitāyāṃ ṣaṣṭhyāṃ sāyāhne tatkāryam | ṣaṣṭhyabhāve tu dūrvedyurastasminneva kāle tatkāryam | jyeṣṭhānakṣatrayuktāyāṃ kuryādvilvābhimantraṇam | iti devīpurāṇavacanāt |-patrīpraveśātpūrvedyuḥ sāyāhne bilvavāsinīm | caṇḍīmāmantrayedvidvānnikṣetrā ṣaṣṭhīpuraskriyā | iti brahmāṇḍapurāṇācca |-jyeṣṭhā vāpyathavā ṣaṣṭhī sāyaṃkāle na cedbhavet | sāyameva tathāpi syādvilvaśākhābhimantraṇam | dūrvāṃ ṣaṣṭhīṃ sanakṣatrāṃ sāyaṃ prāptāmapi tyajet | yadā tu patrikāpūjā na paredyurbhaviṣyati | iti matsyasūktācca | yadā ca vṛddhivaśātpraveśadine pūrṇā saptamī navamī ca svaprayuktapūjārhā paurvāhṇikī saptamyāścaturthadine bhavati tadā tryahasādhyamapi patrikāpūjanaṃ caturahvyāpi kāryam | yadā vā praveśadinottaradine bhavettadā dvyahavyāpi kāryam—vratī prapūjayeddevīṃ saptamyādidinatraye | dvābhyāṃ caturahobhirvā hrāsavṛddhivaśāttitheḥ | iti bhaviṣyokteḥ | patrikāpūjanaṃ ca prāksthāpitadevīpratimāsamīpe eva kāryam | pratimāpūjanasyāpi saptamyāmevetyuktapakṣe pratimāyāścāpi patrikayaiva saha praveśādivisarjanāntaṃ kāryamityuktaṃ durgābhaktitaraṅgiṇyām