Abdadidhiti 4.p46

4.p46

atra rājño yaṣṭikākarṣaṇamuktamādityapurāṇe—kuśakāśamayīṃ kuryādyaṣṭikāṃ sudṛḍhāṃ navām | tāmekato rājaputrā hīnavarṇāṃstathānyataḥ | gṛhītvā karṣayeyurvai yathācāraṃ muhurmuhuḥ | jaye ca hīnajātīnāṃ jayo rājñastu vatsaram | jayacihnamidaṃ rājā vidadhīta prayatnataḥ | iti | sarvasādhāraṇaṃ kāryāntaramapi tatraivatasmāddyūtaṃ prakartavyaṃ prabhāte tatra mānavaiḥ | tasmin dyūte jayo yasya tasya saṃvatsaraṃ śubham | parājaye viruddhaṃ tu labdhanāśastato bhavet | śrotavyaṃ gītavādyādi svanuliptaiḥ svalaṅkṛtaiḥ | viśecca bhavanaṃ svīyaṃ praśastairbāndhavaiḥ saha | tasyāṃ niśāyāṃ kartavyaṃ śayyāsthānaṃ suśobhanam | dayitābhiśca sahitairneyā sā ca bhavenniśā | navairvastraiśca saṃpūjyā dvijasaṃbaṃdhibāndhavāḥ | iti | tathā rājānaṃ prati kāryāntaramuktaṃ nirṇayāmṛte skānde—kṛtvaitatsarvameveha rātrau daityapaterbaleḥ | pūjāṃ kuryānnṛpaḥ sākṣādbhūmau maṇḍalake śubhe | balināmākhyadaityendraṃ varṇakaiḥ pañcaraṅgakaiḥ