Abdadidhiti 4.p48

4.p48

dyūtavarjaṃ pūrvaviddhāyāmeva kāryam | karmakālavyāptilābhāt |śrāvaṇī durganavamī dūrvā caiva hutāśanī | pūrvaviddhā prakartavyā śivarātrivaṃlerdinam | iti vacanācca | dyūtaṃ tu govardhanapūjāvidhau paṭhitamapi tasyāmiva dyūte dvitīyāvedhaprayuktāpavādābhāvātparadina eva kāryam | nārīkartṛkanīrājanamaṅgalamālikātmakaṃ kāryadvayaṃ tu muhūrtamātrāyāmuttarasyāmeva pratipadi kāryam |labhyate yadi vā prātaḥ pratipaddhaṭikādvayam | tasyāṃ nīrājanaṃ kāryaṃ sāyaṃ maṅgalamālikā | iti madanaratne bhaviṣyokteḥ nīrājanaṃ prātaḥ kāryam |-nārīnīrājanaṃ prātaḥ sāyaṃ maṅgalamālikā | atha cetpratipatsvalpā nārīnīrājanaṃ bhavet | dvitīyāyāṃ tadā kuryātsāyaṃ maṅgalamālikām | iti brāhmavacanāt | svalpāmāyuktāyāmapi pratipadi na kāryaṃ caitat-āśvinānte yadā darśa nārīnirājanaṃ bhavet | nārīṇāṃ tatra vaidhavyaṃ deśe durbhikṣameva ca | kārtike śukla pakṣādāvamāvasyā ghaṭīdvayam | deśabhaṅgabhayānnaiva kuryānmaṅgalamālikām | iti devīpurāṇavacanāt | iti pratipatkṛtyam