Abdadidhiti 4.p8

4.p8

atha rājayogyamukhyāśvalakṣaṇam | śālihotre—arkapatrasavarṇasya dantā hyaviralāḥ samāḥ | lākṣārasasamā jihvā sta-| nau cottaratālu ca | maṇivaiḍūryavarṇai ca netre yasya nakhāstathā suśukravāhano vāho viṣaye yasya tiṣṭhati | kauravya pṛthivī tasya caturantā sasāgarā | ājñāvinirjitā tiṣṭhedyasyāśvastādṛśo bhavet | saṃgrāme vijayī caiva sarvakāmārthadaḥ sadā | śukapakṣasavarṇaśca yasya raktaṃ bhavecchiraḥ | snigdhaṃ sarvasamaṃ cākṣi nānyadvarṇena cāvṛtam | tena rāṣṭraṃ ca kośaśca koṣṭhāgāraṃ ca vardhate | gauro maṇinibhaścaiva śvetāśvastāmratālukaḥ | balaṃ ko śo'tha mitrāṇi prajā tenaiva vardhate | śvetāśvastāluraktaśca madhvakṣo lohitaiḥ saṭaiḥ | āvartaśuddhaṃ taṃ vāhaṃ rājā veśmani vāsayet | tena rāṣṭraṃ ca kośaśca koṣṭhāgāraṃ ca vardhate | kṛṣṇameghaprabho vājī meghadundubhinisvanaḥ | kṛṣṇasarpa ivodagraḥ śubhasatvagatiśca yaḥ | etenānuprayātasya cakraṃ na pratihanyate | śaṅkhaśveto bhavedvājī śaṅkhaghoṣasamasvanaḥ | sa śīghraṃ haṃsavadgacchennātyarthaṃ vinatonnataḥ | tena rāṣṭraṃ ca kośaśca koṣṭhāgāraṃ ca vardhate | ariṣṭavarṇo vinatastāmroṣṭhastāmratālukaḥ | parābhūtāśca tiṣṭhanti śatravaḥ kāmado hi saḥ | puṣkaraṃ pṛthivī mālā candro vai lāṅgalaṃ gadā | dhanuḥ śaṅkhaḥ patākā vā lalāṭe yasya dṛśyate | sarvaśuklāni kauravya tasya pārthivalakṣaṇam | ś‍vetapādaśca turagaḥ ś‍vetajihvaśca lohitaḥ | ānandaṃ taṃ vijānīyātpararāṣṭrapramardanam | cakraṃ vā yadi vā vajramāyataṃ vā dhanurbhavet | varṇyānyatvena kauravya tasya pārthivalakṣaṇam | etaddhi lakṣaṇaṃ rājā yeṣu cāśveṣu lakṣayet | teṣāmāstaraṇaṃ lepaṃ śirasthānānulepanam | agramālāgragandhāśca bhojanāgraṃ tathaiva ca | deyaṃ nityaṃ sadāśvebhyaḥ kartavyāśca pradakṣiṇāḥ | turaṅgāḥ pūjitāḥ samyagyasya tiṣṭhanti veśmani | vardhate putrapautraiśca mitraiḥ śatrūñjayatyatha | iti | athāśvaśālāyāṃ kartavyaṃ nākule'śvacikitsite | mandurānte sadā dhāryo raktavarṇo mahākapiḥ | sarvāmayavināśāya vājināṃ ca vivṛddhaye | vājiśālā tu mandurā iti kośaḥ | viṣṇudharmottare—turaṅgārthaṃ tathā dhāryāḥ pradīpāḥ sārbarātrikāḥ | kukkuṭāṃścāraṇāṃścaiva markaṭāṃśca viśeṣataḥ | dhārayedaśvaśālāsu savatsāṃ dhenumeva ca | ajāśca dhāryā yatnena turaṅgāṇāṃ hitaiṣiṇā | iti | śyāmaraktamukhabhedena vānaramarkaṭabhedo'tra bodhyaḥ | anyacca—gogajāśvāviśālāsu tatpurīṣasya niṣkramam | astaṃ gate na kurvīta devadeve divākare | iti