Kriyakaumudi (Govindananda) 1.p44

1.p44

karttavyā pañcamīyuktā caturthī kāmadāyinī | pañcamī ca tathā kāryyā caturthīsahitā vibho || yatta,– pañcamī ca prakarttavyā ṣaṣṭhyā yuktā tu nārada | na hi ṣaṣṭhī nāgaviddhā karttavyā tu kadācana || iti brahmavaivarttavacanam | tat bhinnaśrutikalpanābhayāt yugmavacanavirodhācca tadekavākyatayā ayuktetyakārapraśleṣeṇa vyākhyeyam | ataevottarārddhaṃ saṅgacchate, anyathā dvayordvayoḥ parasparasambandhatā syāt, mahārṇave tu ṣaṣṭhyayukteti spaṣṭameva likhitaṃ vyākhyātañceti | madanapārijāte nāgapañcamīviṣayatayā vyākhyātaṃ śravaṇāt | skānde,– nāgaviddhā na karttavyā ṣaṣṭhī caiva kadācana | saptamīsaṃyutā sā tu kāryyā dharmārthadāyinī || viṣṇudharme,– ekādaśyaṣṭamī ṣaṣṭhī paurṇamāsīcaturddaśī | amāvaśyā dvitīyā ca upodhyāḥ syuḥ parānvitāḥ || paurṇamāsyāḥ pūrvvacaturddaśī paurṇamāsīcaturddaśīti samastaṃ padaṃ śuktetyartha iti vyākhyātaṃ kālaviveke | kvacitcaturthīcaturddaśīti pāṭhaḥ | skandaṣaṣṭhī tu pañcamīyutaiva kāryyā | brahmavaivartte,– kṛṣṇāṣṭamī skandaṣaṣṭhī śivarātriścaturddaśī | etāḥ pūrvvayutāḥ kāryyāstithyante pāraṇaṃ bhavet || skānde,— ṣaṣṭhyekādaśyamāvāsyā pūrvvaviddhā tathāṣṭamī | pañcamī paraviddhā ca nopoṣyaṃ tithipañcakam || aṣṭamī navamīviddhā karttavyā bhūtimicchatā | saptamīsahitā seyaṃ na karttavyā śikhidhvaja || aṣṭamyā navamī miśrā navamyā cāṣṭamī tathā | arddhanārīśvaraprāyā umāmāheśvarī tithiḥ || pūrṇimā paraviddhā ceti kvacit pāṭhaḥ | brahmavaivartte,— saptamī nāṣṭamīyuktā saptamyāpi na cāṣṭamī | sarvveṣu vratakalpeṣu aṣṭamī parataḥ śubhā || parato navamīyuktetyarthaḥ | yattu,— kṛṣṇapakṣe'ṣṭamī caiva kṛṣṇapakṣe caturdaśī | pūrvvaviddhaiva karttavyā paraviddhā na kutracit || iti vacanaṃ, tadamūlameva sākaratvābhimāne rohiṇyaṣṭamīviṣayaṃ mantavyam | padmapurāṇe,— navamyekādaśī caiva daśamīviddhā yadā bhavet | tadā varjyā viśeṣeṇa gaṅgāmbhaḥ surayā yathā || yattu,— aṣṭamī navamīviddhā karttavyā phalakāṅkṣibhiḥ | daśamī ca prakarttavyā sadaurgī caiva sarvvadā