Kriyakaumudi (Govindananda) 1.p43

1.p43

yacca | dvitīyā pañcamī vedhādaṣṭamī ca trayodaśī | caturdaśī copavāse hanyuḥ pūrvvottare tithī || upavāse saptamī tu vedhāddhantyuttarāṃ tithim | iti vṛhadvasiṣṭhanāmakaṃ vacanam | tasyāyamarthaḥ,— dvitīyādyastithayaḥ svavedhāt svasaṃyogāt pūrvvottare tithī yathāyathaṃ hanyuḥ yathā dvitīyā svavedhāt pūrvvāṃ pratipadaṃ kvaciduttarāṃ rambhātṛtīyāṃ yugādyātṛtīyāñca vakṣyamāṇaviśeṣavacanāttathā pañcamī uttarāṃ ṣaṣṭhīṃ kvacit pūrvvāṃ caturthīṃ vināyakavrataviṣayāṃ vakṣyamāṇavacanāt, daśamī pūrvvottare navamyekādaśyau trayodaśī śuklā pūrvvottare dvādaśīcaturddaśyau yathā caturdaśī kṛṣṇā uttarāṃmāvāsyāṃ kvacittu pūrvvāṃ trayodaśīṃ | yathā rājamārttaṇḍe,— trayodaśyāṃ navamyāṃ yo devāniṣṭān prapūjayet | niyatātmāpyupavaset sa labhedopsitaṃ phalam || etadviṣayaiva caturdaśīvedhanindā, upavāsehanyurityabhidhānāt tathā saptamīdvattarāṣṭamīmevetyarthaḥ | ataeva śaṅkaragītāyām,— nāgaviddhā ca yā ṣaṣṭhī saptamyā ca tathāṣṭamī | daśamyaikādaśī viddhā trayodaśyā caturdaśī || bhūtaviddhāpyamāvāsyā na grāhyā munipuṅgavaiḥ | yattu,— tṛtīyā ca na karttavyā dvitīyāsahitā vibho | iti brahmavaivarttavacanaṃ tat rambhātṛtīyāvrataviṣayam | taduktaṃ tatraiva | rambhākhyāṃ varjjayitvā tu tṛtīyāṃ dvijasattama | anyeṣu sarvvakāryyeṣu gaṇayuktā praśasyate || gaṇaścaturthī tena yuktā ityarthaḥ | ataeva1 śivarahasye,— aṣṭamyekādaśī ṣaṣṭhī dvitīyā ca caturddaśī | karttavyāḥ parasaṃyuktāḥ parāḥ pūrveṇa miśritāḥ || brahmavaivartte,— dvitīyāśeṣasaṃyuktāṃ rambhākhyāṃ dadate tu yaḥ | sa yāti narakaṃ ghoraṃ kālasūtraṃ bhayānakam || tathā,— caturthīsaṃyutā kāryyā tṛtīyā ca caturthikā | tṛtīyā yutā caiva pañcamyā naiva kārayet || caturthīsaṃyutā tṛtīyeti rambhāvrataviṣayaṃ tṛtīyāyutā caturthīti vināyakavrataviṣayam | ataeva,— caturthī gaṇanāyasya mātaviddhā praśasyate | mātṛtithistṛtīyā | skandapurāṇe,—