Kriyakaumudi (Govindananda) 5.p31

5.p31

kruddhā bhagavatī tasya sarvvān kāmān nihanti ca | paratra ca mahāmāyābalirbhūtvā sa jāyate || atra phalaikyāt karmaṇo'pyekyaṃ karmabhede hi saṅkalpāvāhana visarjjanadakṣiṇā api pratikarmma syuḥ| nindāśravaṇāccāvaśyakatayā putrādidvārāpi karttavyatā'syeti| tataśca karmmādau patrīsthāpanottaramāvāhanāt prāgeva saṅkalpaḥ saptamyāṃ kāryyaḥ nalaṣṭamyādau pratipūjāsu pratyekaṃ saṅkalpaḥ, na ca saptamyāmārabhya śaratkālīnapūjāmahaṃ kariṣye ityevaṃ rūpaḥ śaratkālīnapūjātvāvāhanādi visarjanantā | anye tu aṣṭamyāmabhekaṃ saṅkalpamācaranti tanmate saptamīpūjāyāstaṭasthatā syāditi | bhaviṣye'pi phalāntaramuktam,anena vidhinā devīṃ pūjayedyo hi mānavaḥ | marttye ca śreṣṭhatāṃ yāti dhanadhānyasutānvitaḥ || nīco vā nirguṇo vāpi satyācāravivarjjitaḥ | naraḥ svargamavāpnoti vidhinā pūjayedyadi || bhojayedvai kumārikā iti | tathāca devīpurāṇe,na tathā tuṣyati śivā homadānajapena tu | kumārībhojanenātra yathā devī prasīdati || pūjanīyādevīrūpamāha dhyāyeddaśabhujāmiti | durgātantraṃ daśākṣarajayadurgāmantraḥ | visarjanaṃ daśamyāmiti rātryādau visarjanaṃ na kāryyam | devīpurāṇe,— patrīvisarjanaṃ rātrau praveśaṃ vā karoti yaḥ | tasya rāṣṭravināśaḥ syāt pūjā ca viphalā bhavet || rātrāviti sāyāhnādiniṣiddhakālopalakṣaṇaṃ devakṛtyasya pūrvāhṇe prāśastyāt | tathā devīpurāṇe,— dviśarīre care vāpi lagne kendragate ravau | varṣe varṣe ca karttavyaṃ sthāpanañca visarjanam || jyotiṣe,— dhanaṃ dhānyaṃ care lagne dviśarīre ca pūjitā | rājño vināśaṃ kuryyāt sthiralagne śivārpitā || atra śravaṇāyāṃ visarjane guṇātiśayaḥ śravaṇāntapāde tu phalātiśayaḥ | yathā kālikāpurāṇe,— antapāde divābhāge śravaṇā ca yadā bhavet | tadā saṃpreṣaṇaṃ devyā daśamyāṃ śāradotsavaiḥ || śravaṇānte visarjayediti prāgapyuktam | śāradotsavamāha tatraiva,— śaṅkhatūryyaninādaiśca mṛdaṅgaiḥ paṭahaistathā | dhūlikardamavikṣepaiḥ krīr̤ākautukamaṅgalaiḥ || bhagaliṅgābhidhānaiśca bhagaliṅgapragītakaiḥ | bhagaliṅgakriyāśabdaiḥ krīr̤ayeyuralaṃ janāḥ