Krityasarasamuccaya (Amritanatha Jha Sharman) 2.p24

2.p24

staraṇāsanapiṇḍeṣu ṣaṭ kuśān parivarjayet || piṇḍārthaṃ ye stṛtā darbhā yaiḥ kṛtaṃ pitṛtarpaṇam | mūtrocchiṣṭe dhṛtā ye ca teṣāṃ tyāgo vidhīyate || iti | atha haritālikā--bhādraśuklatṛtīyā haritālikā | tathā hi divodāsīye-bhādrasya kajjalī kṛṣṇā śuklā ca haritālikā | sā ca parayutā grāhyā tathā hi mādhavaḥ-muhūrttamātrasattve'pi dine gaurīvratampare | śuddhādhikāyāmapyevaṃ gaṇayogapraśaṃsanāt || skānde--kalā kāṣṭhā muhūrttā'pi dvitīyā yadi dṛśyate | sā tṛtīyā na karttavyā karttavyā gaṇasaṃyutā || iti | brahmavaivarte'pi-"rambhākhyāṃ varjayitvā tu tṛtīyāmi"tyādi | purāṇasamuccaye'pi-dvitīyāśeṣasaṃyuktāṃ yā karoti vimohitā | sā vaidhavyamavāpnoti pravadanti manīṣiṇaḥ || iti | saṃyuktāmiti tṛtīyāmiti śeṣaḥ | atra pārvatīśivayoḥ pūjā || atha caturthyāṃ candradarśane doṣamāhamārkaṇḍeyaḥ-siṃhāditye śuklapakṣe caturthyāṃ candradarśanam | mithyābhiśāpakurute tasmātpaśyenna taṃ tadā ||(1) tadeti caturthyāṃ na taccandraṃ paśyedityarthaḥ | tena tatroditasya pañcamyāṃ darśane na doṣa iti tātparyyam | atra caturthyāmeva darśananiṣedhastasyāmeva candrapūjanaṃ darśanaṃ ca vyavahārasiddhamato doṣaśāntyarthaṃ (2)'siṃhaḥ prasenabhavadhīt' ityādi dhātreyikāvākyaṃ prāṅmukha udaṅmukho vā paṭhet | 'paṭheddhātreyikāvākyaṃ prāṅmukho vā'pyudaṅmukhaḥ' | iti