Bhagavantabhaskara 23.p5

23.p5

etadasaṃbhave tilatarpaṇaṃ vā kāryamityuktaṃ tatraiva viṣṇupurāṇe— pānīyamapyatra tilairvimiśraṃ dadyātpitṛbhyaḥ prayato manuṣyaḥ | śrāddhaṃ kṛtaṃ tena samāḥ sahasraṃ rahasyametanmunayo vadanti || iti | tathā cātra malamāse sati viśeṣaścandrikāyām— yaugādikaṃ māsikaṃ ca śrāddhaṃ cāparapakṣikam | manvādikaṃ tairthikaṃ ca kuryānmāsadvaye'pi ca || aparapakṣo nāma kṛṣṇapakṣo'tra gṛhyate | malamāse mahālayasya niṣedhāt || jyeṣṭhaśuklatṛtīyā rambhātṛtīyācyate | sā pūrvā grāhyā | taduktaṃ mādhavīye skānde— bṛhattapā tathā rambhā sāvitrī vaṭapaitṛkī | kṛṣṇāṣṭamī ca bhūtā ca kartavyā saṃmukhī tithiḥ || iti | sammukhī nāma sāyāhnavyāpinītyarthaḥ | brahmavaivarte'pi— rambhākhyāṃ varjayitvaikāṃ tṛtīyāṃ dvijasattama | anyeṣu sarvakāryeṣu gaṇayuktā praśasyate !| iti | gaṇaścaturthī | bhādrakṛṣṇatṛtīyāyāṃ viśālākṣīyātroktā kāśīkhaṇḍe— bhādrakṛṣṇatṛtīyāyāmupavāsaparairnṛbhiḥ | kṛtvā jāgaraṇaṃ rātrau viśālākṣīsamīpataḥ || iti | atra rātrivyāpinī grāhyā | rātrau jāgaraṇavidhānāt | bhādraśuklatṛtīyā haritālikocyate | sā muhūrtamātrā'pi parayutā grāhyā | tadāha vāmanaḥ— muhūrtamātrasattve'pi dine gaurīvrataṃ pare | śuddhādhikāyāmapyevaṃ gaṇayogapraśaṃsanāt || iti | caturthīyuktāyāṃ tu phalādhikyamāha mādhavīye āpastambaḥ— caturthīsahitā yā tu sā tṛtīyā phalapradā | avaidhavyakarā strīṇāṃ putrapautrapravarddhinī || dvitīyāyoge pratyavāyamapyāha—sa eva | dvitīyāśeṣasaṃyuktāṃ yā karoti vimohitā | sā vaidhavyamavāpnoti pravadanti manīṣiṇaḥ || iti | āśvinakṛṣṇatṛtīyāyāṃ lalitādevyā yātroktā kāśīkhaṇḍe— iṣe kṛṣṇatṛtīyāyāṃ lalitāṃ pratipūjya vai | nārī vā puruṣo vāpi sa labhedvānchitaṃ phalam || iti