Bhagavantabhaskara 46.p2

46.p2

piṇḍapratipattimāha sa eva— piṇḍāṃstu gojaviprebhyo dadyādagnau jale'pi vā | patnyāḥ putrakāmanāyāṃ tu vāyupurāṇe— patlyai prajārthī dadyāttu madhyamaṃ mantrapūrvakam || iti | mantrastu matsyapurāṇe— ādhatta pitaro garbhaṃ mantraḥ santānavarddhanaḥ || iti | madhyamapiṇḍaprāśanaṃ ca kevalaṃ kāmyameva na nityamiti dvaitanirṇaye tātacaraṇāḥ | itarapiṇḍadvayaṃ kāmanābhāve trayamapi gavādau pratipādyam | bṛhaspatiḥ— anyadeśagatā patnī garbhiṇī rogiṇī tathā | tadā taṃ jīrṇavṛṣabhaśchāgo vā bhoktumarhati || tīrthaśrāddhe pratipattyantaraṃ viṣṇudharmottare— tīrthaśrāddhe sadā piṇḍān kṣipettīrthe samāhitaḥ | dakṣiṇābhimukho bhūtvā pitryā dik sā prakīrtitā | iti | ucchiṣṭamārjane viśeṣamāha yājñavalkyaḥ— satsu vipreṣu sarveṣu dvijocchiṣṭaṃ na mārjayet | iti | satsviti aparāhṇatopalakṣaṇārtham— bhṛtyakarmavṛto bhuṅkte havyaṃ kavyaṃ svagotrajaiḥ | āsāyaṃ śrāddhaśālāyāṃ dvijocchiṣṭaṃ na mārjayet || iti pracetovacanāt | mātsye— tataśca vaiśvadevānte sabhṛtyaḥ sahabāndhavaḥ | bhuñjītātithisaṃyuktaḥ sarvaṃ pitṛniṣevitam || iti | śrāddhaśeṣabhojanaṃ tu divaiva kāryamityāha jātūkarṇyaḥ— ahanyeva tu bhoktavyaṃ kṛte śrāddhe dvijanmabhiḥ | anyathā hyāpuraṃ śrāddhaṃ parapāke ca sevite || devalaḥ— śrāddhaṃ kṛtvā tu yo bhuṅkte na bhuṅkte'tha kadācana | devā havyaṃ na gṛhṇanti kavyāni pitarastathā || taddine nityopavāsaprāptau tu śrāddhaśeṣāvaghrāṇamevetyuktaṃ samayamayūkhe