Cakranarayaniyanibandha 1.p87.3

1.p87.3

tasmādvai saptamīviddhā kāryā durgāṣṭamī budhaiḥ | tathā-viṣṭiṃ tyaktā mahāṣṭamyāṃ mama pūjāṃ karoti yaḥ | tasya pūjāphalaṃ na syāttenāhamapamānitetyādīni iti cet satyam | saptamīviddhāvidhāyakavacanānyagrimadine'ṣṭamyabhāvaviṣayakāṇi | naca 'saptamyāmurite sūrye parataścāṣṭamī bhavet | tatra durgotsavaṃ kuryānna kuryādaparehani | durbhikṣaṃ tatra jānīyānnavamyāṃ yatra pūjyate' | ityādīni paradine'ṣṭamīlābhepi saptamīviddhāvidhāyakānīti vācyam | teṣāṃ navamīkṣayaviṣayatvāt | taduktaṃ smṛtisaṃgrahe-'yadā sūryodaye na syānnavamī cāpare'hani | tadāṣṭamī prakurvīta saptamyā sahitāṃ nṛpa' | durgotsavepi-uttarāstithayo yatra kṣayaṃ yānti pare'hani | pūrvāṣṭamīṃ tadā kuryādanyathā tvaśubhaṃ bhavet | sūryasenamahīpālanibandhe tu navamīyuktāṣṭamīniṣedhakavākyāni kṛṣṇapakṣe navamyāṃ vihite devīprabodhe tadaṅgatvena kriyamāṇakṛṣṇāṣṭamyadhikaraṇakadevīpūjāviṣayāṇi | 'kṛṣṇapakṣe'ṣṭamī caiva kṛṣṇapakṣe caturdaśī' ityādivākyaiḥ kṛṣṇāṣṭamyāḥ pūrvaviddhāyā eva prāśastyābhidhānāt | naca rūpanārāyaṇanibandhe tu aṣṭamīsāmānyanirṇayavākyānyeva likhitāṃna na mahāṣṭamyā viśeṣānnirṇaya iti vācyam | āśvayukśuklapakṣe tu yāṣṭamī mūlasaṃyutā | tathā, mūlenāpi hi saṃyuktetyādivākyairviśeṣanirṇayakaraṇāt | āśvayugiti kanyāgata ityādiviśeṣaliṅgairmahāṣṭamyā eva pratipādanāditi | yaccānantabhaṭṭīyādiṣu mahāṣṭamyādiviśeṣanirṇayo na kṛtaḥ | teṣāṃ granthakṛtāmiyaṃ śailī yat sāmānyanirṇayaprāptānāṃ viśeṣanirṇayaprayāso na kriyate iti |