Cakranarayaniyanibandha 1.p87.4

1.p87.4

tasmādrusraṃdhyorityādisāmānyavākyanirṇītāyā mahāṣṭamyā nirṇayārthaṃ vyarthaṃ viśeṣavākyaprapañcenetyanantabhaṭṭādīnāmabhiprāyaḥ | nanu bhaviṣyottare-tatrāṣṭamyāṃ bhadrakālī dakṣayajñavināśinī| prādurbhūtā mahāghorā yoginīkoṭibhiḥ saha'iti, atra ahanīti divāpūjā vidhīyate | tathā-niśāyāṃ pūjitā devī vaiṣṇavī pāpanāśinī, tasmātsarvaprayatnena aṣṭamyāṃ niśi pūjayeta | tathā-mahāṣṭamyāśvine māsi śuklā kalyāṇakāriṇī | saptamyā saṃyutā kāryā mūlena tu viśeṣataḥ' ityādivākyairvividhipūjāyā vidhānānniśi pūjāyāṃ saptamīviddhā divāpūjāyāṃ navamīviddhādriyatāmiti ced | bhrāntosi, saptamīviddhāvidhāyakavacanānāṃ tithikṣayaparatvādiyuktam | kimatra vinigamakamiti cetsatyam | mahāprāmāṇikakavilikhitayoḥ smṛtisaṃgrahadurgotsavayorvacane eva 'sūryodaye yadā na syānnavamī cāpare'hani | tadāṣṭamīṃ prakurvīta saptamyā sahitāṃ nṛpa' | 'uttarā stiyau yatra kṣayaṃ yānti narādhipa | pūrvāṣṭamīṃ tadā kuryādanyathā tvaśubhaṃ bhavet' iti | tavatu vacanābhāvādgauravādupavāsadvayakalpanāpatteśca pūjādvayakalpanā kalpaneva | naca tenāhamapamāniteti niṣedhavacanasya nirviṣayatvāpattiḥ, tithikṣayaviṣayatvāt | ayamabhiprāyaḥ | aṣṭamīkṣayavaśātsaptamīviddhāṣṭamīprāptau viṣṭibhiyā divaiva pūjā yena tyajyate tenāhamapamāniteti | tasmādekasyāmevāṣṭamyāṃ divāpūjāniśīthapūjayorubhayorapi karaṇe lāghavaṃ tithidvaye karaṇe gauravamiti | yattvānandakaradīkṣitaiḥ svakṛte viśvarūpanibandhānusāriṇidaityanārāyaṇanibandhe likhitam |