Gadadharapaddhati 3.p16.2
Gadādharapaddhati 3.p16.2
- Language
- Sanskrit
3.p16.2
te ca triṃśadahorātramityāha bhagavān haraḥ | etādṛśāhorātrasya śruti-smṛti-purāṇa-jyotiḥśāstreṣu divasasya pañcadaśamuhūrttānāṃ pañcadaśanāmāni rātredrapi tathā nānāvidhāni paṭhitāni | prakṛte tu rātrināmnāmanupayogāt divasasya muhūrttanāmānyucyante | tathā ca śaṅkhaḥ,— raudraśvaitraśca maitraśca tathā śālakaṭaḥ smṛtaḥ | sāvitraśca jayantaśca gāndharvvaḥ kutapastathā || rauhiṇaśca virañciśca vijayo nairrṛtastathā | mahendro varuṇaścaiva bhedāḥ pañcadaśa smṛtāḥ || uttarāyaṇe divasavṛddhau muhūrttānāṃ vṛddhiḥ | dakṣiṇāyane divasasya hānau teṣāṃ hāniśca | tathā ca jyotiḥśāstre,— ahnaḥ pañcadaśāṃśo muhūrtta iti | evaṃ ayanayoḥ rātrāvapi vaiparītyena hrāsavṛddhī jñātavye | evaṃ pañcadhā vibhāgādiṣvapi bodhyaṃ | evaṃ pañcadaśadhā vibhāgaḥ, pañcadhā vibhāgo'pi | tathā ca vyāsaḥ,— muhūrttatritayaṃ prātaḥ tāvāneva tu saṅgavaḥ | madhyāhnastrimuhūrttaḥ syādaparāhnastu tādṛśaḥ || sāyāhnastrimuhūrttastu sarvvakarmabahiṣkṛtaḥ | caturdhā vibhāgo'pi | tathāca gobhilaḥ,— pūrvāhnaḥ praharasvādyaḥ madhyāhnaḥ praharastathā | āttṛtīyādaparāhnaḥ sāyahnastu tataḥ param || tridhā vibhāgo'pi skānde,— ūrddhaṃ sūryyodayāt proktaṃ muhūrttānāṃ tu pañcakam | pūrvāhnaḥ pañcakaṃ prokto madhyāhnastu tataḥ param || aparāhnastataḥ prokto muhūrttānāṃ tu pañcakam | dvedhā vibhāgo'pi | skānde,— āvarttanāttu pūrvāhno hyaparāhnastataḥ paraḥ | tatra pañcadhā vibhāgasya bahupramāṇasammatatvāt prāyeṇa taṃ samāśritya vidhiniṣedhau nirṇīyate | yatra yatra viśeṣavidhistatra tatrānye pakṣā lekhyāḥ ||