Gadadharapaddhati 4.p12
Gadādharapaddhati 4.p12
- Language
- Sanskrit
4.p12
akṣayatṛtīyā | bhaviṣye, - vaiśākhe māsi rājendra tṛtīyā candanasya ca | kaladhautaṃ tathā dhānyaṃ ghṛtaṃ vāpi viśeṣataḥ || tasyāṃ dattantvakṣayaṃ syāt teneyamakṣayā smṛtā | tṛtīyā candanasye(1)tyukteśca candanadānaṃ śastam || dānāttu candanasyeha kañjajo nātra saṃśayaḥ | iti vacanācca | kañjajo brahmā | āgneyādiṣu upānacchatrajalapātradānāndhuktāni,– yā śuklā kuruśārdūla vaiśākhe māsi vai tithiḥ | tṛtīyā sākṣayā loke gīrvāṇairabhivanditā || yo'syāṃ dadāti karakān vārivājasamanvitān | sa yāti puruṣo vīra lokān vai hemamālinaḥ || karakān kumbhān | vājamannam | hemamālinaḥ sūryyasya | viṣṇudharmottare nakṣatraviśeṣe guṇaviśeṣaḥ,– akṣayā sā tithirjñeyā kṛttikābhiryutā yadi | bhaviṣyati mahābhāge viśeṣeṇa phalapradā || vaiśākhe māsi rājendra śuklapakṣe ca yā tithiḥ | tṛtīyā rohiṇīyuktā akṣayā sā prakīrttitā || tathā,– vaiśākhe śuklapakṣe tu tṛtīyāyāṃ dvijottama | yaddadāti naraśreṣṭha tattadakṣayamaśnute || viśeṣeṇa tathā dānamakṣatānāṃ mahāphalam | brāhme,– vaiśākhe māsi śuklāyāṃ tṛtīyāyāṃ janārddana | yavānutpādayāmāsa yugamārabdhavān kṛtam || brahmalokāt tripathagāṃ pṛthivyāmavatārayat | tasyāṃ kāryyo yavairhomo yavairviṣṇuṃ samarcayet