Gadadharapaddhati 4.p129

4.p129

pūrviṃkāṃ vandāpanāṃ kurvanti | samācāra evātra pramāṇam | śrībhuvaneśvarakṣetre caturdaśayātrāmadhye ekāmrapurāṇe prathamāṣṭamīyātrāyā likhitatvāt pramāṇamapyatrāstīti vadanti | tatra modayatrimuhūrttavyāptyā vyavasthā | tithidvaidhe pūrvairyurvandāpanā kṛṣṇāṣṭamītvāt | yattu,— madhyāhnādadhikaṃ kiñcit paratra prathamāṣṭamī | tatra pūjādikaṃ kāryaṃ nyūnā cet pūrvavāsare || iti | tadamanmūlamiti nibandhakṛtaḥ | bhadrāṣṭamī, alabhyayoge lekhyā | bhīṣmāṣṭamī śrāddhaprakaraṇe lekhyā || atha navamī | sā copavāse pūrvaviddhā grāhyā, yugmokteḥ | vrate'pi tathā | aṣṭamyā navamī viddhā karttavyā phalakāṅkṣibhiḥ | na kuryānnavamīṃ tāta daśamyā na kadācana || iti brahmavaivarttokteḥ, tathā brahmokteśca | ata eva mādhavīye,— navamī pūrvaviddhaiva pakṣayo rubhayorapi | iti navamyāḥ sādhāraṇaniyamaḥ || atha rāmanavamī | tadvrataṃ nityaṃ kāmyaṃ ca naramātrādhikārikam | tathācāgastyasaṃhitāyām,— prāpte śrīrāmamavamīdine martyo vimūḍhadhīḥ | upoṣaṇaṃ na kurute kumbhīpākeṣu pacyate || akṛtvā rāmanavamīvrataṃ sarvavratottamam | vratānyanyāni kurute na teṣāṃ phalabhāg bhavet || tathā,― tasmin dine tu kartavyamupavāsavrataṃ sadā | tathā,― kuryādrāmanavamyāṃ tu upoṣaṇamatandritaḥ | māturgarbhamavāpnoti naiva rāmo bhavet svayam || tasmāt sarvātmanā sarvai kṛtyaiva navamīvratam | mucyante pātakaiḥ sarvai yānti brahma sanātanam || iti kevala upavāsenāpi nityasiddhiḥ | kāmyatve tu, śrīrāmanavamī proktā koṭisūryagrahopamā | tasmin dine mahāpuṇye rāmamuddiśya bhaktitaḥ || yatkiñcit kurute karma tad bhavakṣayakārakam | upoṣaṇaṃ jāgaraṇaṃ pitṝnuddiśya tarpaṇam || tasmin dine tu kartavyaṃ brahmaprāptimabhīpsubhiḥ | ityagastyasaṃhitokteḥ sarvāṅgopasaṃhāraḥ kāryyaḥ | tathā,― sūryyagrahe kurukṣetre mahādānaiḥ kṛtairbhuviḥ | yat phalaṃ tadavāpnoti śrīrāmanavamīvratāt || atra madhyāhnaḥ karmakālaḥ | tathācāgastyasaṃhitāyām,― meṣaṃ pūṣaṇi saṃprāpte lagne karkaṭakāhvaye | āvirāsīt sa kalayā kauśalyāyāṃ paraḥ pumān || tathā,― caitraśuklanavamyāṃ tu rāmasya pūjanaṃ bhavet | tato madhyāhnavelāyāṃ sañjāto hi jagatpatiḥ || caitre śuddhā tu navamī punarvasuyutā yadi | saiva madhyāhnayogena mahāpuṇyatamā bhavet || navamī cāṣṭamīviddhā tyājyā viṣṇuparāyaṇaiḥ | upoṣaṇaṃ navamyāṃ vai daśamyāmeva pāraṇam