Gadadharapaddhati 4.p63

4.p63

kṛṣṇajayantyaṣṭamīvratam | tatsvarūpaṃ skānde,—jayaṃ puṇyañca kurute jayantīmiti tāṃ viduḥ | rohiṇīsahitā kṛṣṇāṣṭamī yā śrāvaṇāṣṭamī || viṣṇudharmottare,—rohiṇī ca yadā kṛṣṇapakṣe'ṣṭamyāṃ yudhiṣṭhira | jayantī nāma sā proktā sarvapāpaharā tithiḥ || tadakaraṇe skānde,—śūdrānnena tu yatpāpaṃ śavahastasyabhojane | tatpāpaṃ labhate kunti jayantyāṃ bhojane kṛte || brahmaghnasya surāpasya gobadhe strībadhe'pi vā | na loko yaduśārdūla jayantīvimukhasya ca || tathā,—na karoti yadā viṣṇorjayantīsambhavaṃ vratam | yamasya vaśamāpannaḥ sahate nārakoṃ vyathām || viṣṇurahasyaviṣṇupurāṇayostatkaraṇe phalam,rohiṇyāmarddharātre tu yadā kṛṣṇāṣṭamī bhavet | tasyāmabhyarccanaṃ śaurerhanti pāpaṃ trijanmajam || bhaviṣyottare,- jayantyāmupavāsañca kṛtvā yo'bhyarcayeddharim | tasya janmaśatodbhūtaṃ pāpaṃ nāśāyate'cyutaḥ || kaumāre yauvane bālye vārddhakye yadupārjitam | tatpāpaṃ nāśayet kṛṣṇa stathā tasyāṃ supūjitaḥ || evaṃ yaḥ kurute devyā devakyāḥ sumahotsavam | varṣe varṣe bhāgavato madbhakto dharmanandana || naro vā yadi vā nārī yathoktaṃ phalamaśnute | putrasantānamārogyaṃ dhanadhānyarddhimad gṛham || śālīkṣuyavasampūrṇaṃ maṇḍalaṃ sumanoharam | tasmin rāṣṭre prabhurbhuṅkte dīrghāyurmanasepsitān || paracakrabhayaṃ nāsti tasmin rāṣṭre'pi pāṇḍava | parjanyaḥ kāmavarṣī syādītibhyo na bhayaṃ bhavet || yasmin gṛhe pāṇḍuputra likhyate devakīvratam | na tatra mṛtaniṣkrānti rna garbhapatanaṃ bhavet || na ca vyādhibhayaṃ tatra bhavediti matirmama | na vaidhavyaṃ na daurbhāgyaṃ na tatra kalaho gṛhe || samparkeṇāpi yaḥ kuryyāt kaścijjanmāṣṭamīvratam | viṣṇulokamavāpnoti so'pi pārtha na saṃśayaḥ || iti pratyavāyavīpsayoḥ śravaṇāt phalaśravaṇācca etadvrataṃ nityakāmyam | nityaṃ sadā yāvadāyurvīpsāyogaḥ phalāśrutiḥ | pratyavāyo'nukalpaścetyaṣṭau nityatvabodhikāḥ || iti saṃgrahoktādiṣu eṣāṃ nityādiśabdānāmaṣṭānāṃ madhye ekasyāpyuktau nityatvasiddheḥ | kāmyatayā karaṇe nityatvasyāpi siddhiḥ | kāmyena nityasiddhiḥ syāt prayogo nobhayātmakaḥ | iti smṛteḥ | ekasya tūbhayatve, saṃyogapṛthaktvamiti jaimini nyāyena, “agnihotraṃ juhuyāt” “agnihotraṃ juhuyāt svargakāma” ityādivadekaprayogādubhayasiddhiḥ | kintu kāmye sarvāṅgopasaṃhāre, nitye tu aṅgavaiguṇye'pi phalamiti | atra śūdrāderapyadhikāraḥ, naro veti manuṣyamātrādhikārokteḥ | strīṇāṃ sphuṭo'dhikāraḥ | jayantyāmupavāsaśca mahāpātakanāśanaḥ | sarvaiḥ kāryo mahābhaktyā pūjanīyaśca keśavaḥ || iti bhaviṣyokteḥ, sarvaiḥ śaivādibhiḥ sarvavarṇaiśca kāryyamidaṃ vratam | bhaviṣyottare tu,śrāvaṇe bahule pakṣe kṛṣṇajanmāṣṭamīvratam | na karoti naro yastu bhavati brahmarākṣasaḥ || ityādi | tathā,- varṣe varṣe tu yā nārī kṛṣṇajanmāṣṭamīvratam | na karoti mahāghaughā vyālī bhavati kānane || skānde'pi,-ye na kurvanti jānantaḥ kṛṣṇajanmāṣṭamīvratam | te bhavanti narāḥ prājñā vyālā vyāghrāśca kānane || atītānāgataṃ tena kulamekottaraṃ śatam | pātanaṃ(1) narake ghore bhuñjatā kṛṣṇavāsare