Jayasimhakalpadruma 10.p9

10.p9

dadhyodanamathecchayā | dattvā tebhyaśca sarvebhyaḥ pretebhyo'pyadadāttataḥ| bhuktavatsu ca sarveṣu kāmato'mbhasi sevite | anantaraṃ ca bubhuje pretapālo varāśanam | prakāmamṛpte prete tu vāridhānyodanastataḥ | antardhānamagādbahvanvaṇikputrasya paśyataḥ | tatastadadbhutatamaṃ dṛṣṭvā'sau matimānvaṇik | papraccha taṃ pretapālaṃ kautūhalamanā vaśī | araṇye nirjale deśe kuto'nnasya samudbhavaḥ | kutastu vāridhānīyaṃ saṃpūrṇā paramāmbhasā | tathā vītabhayā bhṛtyāste dhvastā varṇataḥ kṛśāḥ | bhavānapi ca tejasvī kiṃcitpuṣṭavapuḥ śubhaḥ | śuklavastraparīdhāno bahūnāṃ paripālakaḥ | sarvametanmamācakṣva ko bhavānkā śamī tviyam | itthaṃ vaṇiksutavacaḥśrutvā'saupretanāyakaḥ | śaśaṃsa sarvaṃ tasyātha yadvṛttaṃ ca purātanam| ahamāsaṃ purā vipra śākale nagarottame| somaśarmeti vikhyāto bahulāgarbhasaṃbhavaḥ| mamāsti ca vaṇikchrīmānprītivaśyo mahādhanaḥ | sa tu somaśravā nāma viṣṇubhakto mahāyaśāḥ | so'haṃ kadaryo mūḍhātmā dhane'pi sati durmatiḥ| na dadāmi dvijātibhyo na cāśnāmyannamuttamam| pramodādyadi bhuñje'haṃ dadhikṣīraghṛtānvitam | tato rātrau nṛbhirghoraistāḍyate mama vigrahaḥ | prātarbhavati me ghorā mṛtyutulyā viṣūcikā | na ca kaścinmamābhyāśe tatra tiṣṭhati bāndhavaḥ | kathaṃ kathamapi prāṇā mayā saṃpratidhāritāḥ| evametādṛśaḥ pāpo nivasāmyatinirghṛṇaḥ | 1sauvīratilapiṇyāka sakuśākādibhojanaiḥ | kṣapayāmi kadannādyairātmanaḥ kālayāpanam | evaṃ tatra sato mahyaṃ mahānkālo'tyagādatha | śravaṇadvādaśī nām māsi bhādrapade'bhavat | tatranāgarikoloko gataḥ snātuṃ ca saṃgame| airāvatyā naḍulāyā brahmakṣatrapuraḥsaraḥ| prātiveśyaprasaṅgena tatra snātuṃ gato'smyaham | kṛtopavāsaḥ śucimānekādaśyāṃ yatavrataḥ | tataḥ saṃgamatīyena vāridhānīṃ navāṃ dṛḍhām | saṃpūrṇāṃ vastrasaṃvītāṃ chatropānahasaṃyutām | mṛtpātramabhimṛṣṭasya pūrṇaṃ dadhyodanasya vai | pradattaṃ brāhmaṇendrāya śucaye jñānadharmiṇe | tadekaṃ jīvatā dattaṃ mayā dānaṃ vaṇiksuta | varṣāṇāṃ saptatīnāṃ vai nānyaddattaṃ hi kiṃcana| mṛtaḥ pretatvamāpanno dattvā pretonimānapi | amī cānannadā nityaṃ mamānnādyopajīvinaḥ| etatte kāraṇaṃ proktaṃ yaddattaṃ tu sahāmbhasā | dattaṃ tadidamāyāti madhyāhne'pi dine dine | yāvaccānnaṃ na bhuñjehaṃ na tāvatkṣayameti vai | mayi bhukte ca pīte ca sarvamantarhitaṃ bhavet | yaccātapatramadadāṃ so'yaṃ jātaḥ śamītaruḥ | upānadyugale datte preto me vāhano'bhavat | idaṃ tavoktaṃ sarvaṃ hi mayā jñānavatātmanaḥ | śravaṇadvādaśī puṇyā tavoktā puṇyavardhinī | ityevamukte vacane vaṇikputro'bravīdvacaḥ | yanmayā tava kartavyaṃ tadanujñātumarhasi | tattasya vacanaṃ śrutvā vaṇikputrasya nārada | pretapālo vacaḥ prāha svārthasiddhikaraṃ tataḥ