Jayasimhakalpadruma 11.p10.2

11.p10.2

tato liṅgasthitaṃ dhyāyetsuprasannaṃ maheśvaram | dakṣāṅkasthaṃ gajapatimukhaṃ prāmṛśandakṣadoṣṇā vāmorusthaṃ nagapatanayāṅke guhaṃ cāpareṇa | iṣṭābhītī parakarayuge dhārayannindukāntiravyādasmāṃstribhuvananato nīlakaṇṭhastrinetraḥ | evaṃ dhyātvā paśupatermantreṇa snāpayecchivam | śivamantreṇa gandhādīnarpayedvāhitejase | prāgādivāmāvartena dikṣvaṣṭau paripūjayet | śarvaṃ bhavaṃ rudramugraṃ bhīmaṃ paśupatiṃ tathā | mahādevamatheśānaṃ kramātkṣityādimūrtikān | kṣityaptejonilākāśayajamānendubhāskarāḥ | kṣityādayaḥ syuḥ śarvādyāstata indrādikānyajet | dhūpadīpanivedyādinamaskārapradakṣiṇāḥ | japaṃ ca kṛtvā visṛjenmahādevasya mantrataḥ | tāranatyādikā ṅentā harādyā manavo'ṣṭayaḥ | pratiliṅgaṃ yajeddevamakhilāni sahaiva vā | pūjitau nijamantrābhyāṃ visṛjedraṇabhṛdguhau | dhanaputrādikāmaistu śivo'rcyaḥ proktalakṣaṇaḥ | vidyākāmaiścintanīyaḥ paraśuṃ hariṇaṃ varam | jñānamudrāṃ dadhadastairvaṭamūlamupāśritaḥ| puṃsorviruddhayoḥ sandhyau kuryālliṅgāni sādhakaḥ | nadītīradvayānītasṛdā tāni ca pūjayet | tatra dhyeyo hariharaḥ śaṃkhapadmāhiśūlabhṛt | indranīlaśaraccandranibho bhūṣaṇapuñjavān | dampatyoravirodhārthamardhanārīśvaraḥ smṛtaḥ | pīyūṣapūrṇakalaśaṃ dadhatpāśāṅkuśāvapi | uccāṭe māraṇe dveṣe dhyātavyaḥ punarīdṛśaḥ | kālīhastāmbujālambaśūlaprotadviṣaccayaḥ | muṇḍamālālsatkaṇṭho roṣavināsitākhilaḥ | itthaṃ tu kāmanābhedāddhyānabhedāḥprakīrtitāḥ | pūjayetkāryavaśato lakṣāvadhi sahasraśaḥ | lakṣapārthivaliṅgānāṃ pūjanādbhuktimuktibhāk | lakṣaṃ tu guḍaliṅgānāṃ pūjanātpārthivo bhavet |