Jayasimhakalpadruma 11.p10.3

11.p10.3

yā nārī guḍaliṅgāni sahasraṃ pūjayetsatī | bhartuḥ sukhamakhaṇḍaṃ sā prāpyante pārvatī bhavet | navanītasya liṅgāni saṃpūjyeṣṭamavāpnuyāt | bhasmano gomayasyāpi vālukāyāstathā phalam | krīḍantaḥ pṛthukā bhūmau liṅgaṃ kṛtvā rajomayam | pūjayanti vinodena te'pi syuḥ kṣitidāyakāḥ | prātargomayaliṅgāni nityaṃ yastrīṇi pūjayet | bṛhatībilvayoḥ patrairnaivedyaṃ guḍamarcayet | evaṃ māsatrayaṃ kurvannalpaṃ labhate dhanam | ekādaśaiva liṅgāni gomayotthāni yo'rcayet | prātarmadhyāhnayoḥ sāyaṃ niśīthe prativāsaram | sa sarvāḥ saṃpado yāyātṣaṇmāsairnaivamādarāt | ekādaśa yajennityaṃ śālipiṣṭakṛtāniyaḥ | liṅgāni māsamātreṇa sa kalmaṣacayaṃ dahet | sphāṭikaṃ pūjitaṃ liṅgamenonānikaranāśanam | sarvakāmapradaṃ puṃsāmudumbarasamudbhavam | revāśmajaṃ sarvasiddhipradaṃ duḥkhavināśanam | yathā kathaṃcilliṅgasya pūjā nityaṃ kṛteṣṭadā | yo'rcayetpicumandotthaiḥ patrairgomayajaṃ śivam | kruddhaṃ maheśvaraṃ dhyāyansa parājayate ripūn | yo liṅgaṃ pūjayennityaṃ śivabhaktiparāyaṇaḥ | merutulyo'pi tasyāśu pāparāśilayaṃ brajet | caturdaśyāṃ tathā'ṣṭamyāṃ paurṇamāsyāṃ vidhukṣaye | payasā snāpite śaṃbhau dharādānaphalaṃ labheta | dogdhrīṇāṃ tu gavāṃ lakṣaṃ yo dadyādvedapāṭhine | pārthivaṃ yo'rcayelliṅgaṃ tayorliṅgārcako varaḥ | liṅgapūjāṃ vidhāyogre stotraṃ vā śatarudriyam | prajapettanmanā bhūtvā śive svaṃ vinivedayet | yatsaṃkhyākaṃ yajelliṅgaṃ tanmitaṃ homamācaret | ājyānvitaistilairagnau ghṛtairvā pāyasena vā || śivamantreṇa tasyānte brāhmaṇānbhojayecchatam |