Jayasimhakalpadruma 11.p7.2
Jayasīṃhakalpadruma 11.p7.2
- Language
- Sanskrit
11.p7.2
tatrākaraṇe pratyavāyaḥ skandapurāṇe paṭhyate | 'parātparataraṃ nāsti śivarātriḥ parātparam | na pūjayati bhaktyeśaṃ rudraṃ tribhuvaneśvaram | janturjanmasahasreṇa bhramate nātra saṃśayaḥ|' iti | vīpsāpi tatraiva paṭhitā|'varṣe varṣe mahādevi naro nārī pativratā | śivarātrau mahādevaṃ kāmaṃ bhaktyā prapūjayet |' iti | nityaniścalaśabdau ca tatraiva |'māghakṛṣṇacaturdaśyāṃ yaḥ śivaṃ śaṃsitavrataḥ | mumukṣuḥ pūjayennityaṃ sa labhedīpsitaṃ padam |' iti |'sāgarā yadi śuṣyeta kṣīyeta himavānapi | merumandaraśailāśca śrīśailo vindhya eva ca | calantyete kadācidvai niścalaṃ hi śivavratam |' iti | kāmyatvaṃ ca phalaśravaṇādavagantavyam | tathā ca skandapurāṇe- 'śivaṃ ca pūjayitvā yo jāgarti ca caturdaśīm | mātuḥ payodhararasaṃ na pibetsa kadācana | yadīcchedvānchitānbhogāndivi devamanoramān | āgamoktavidhiṃ kṛtvā prāpnoti paramaṃ padam| mama bhaktastu bho devi śivarātrrimupoṣya ca | gaṇatvamakṣayaṃ divyamakṣayaṃ śivaśāsanam |' iti 'sarvānbhuktā mahābhogānmṛto bhūyo na jāyate |' iti | kāmyavratasyeśānasaṃhitāyāṃ varṣasaṃkhyā paṭhyate | 'evametadvrataṃ kuryātpratisaṃvatsaraṃ vratī | dvādaśābdikametatsāccaturviṃśābdikaṃ tathā| sarvānkāmānavāpnoti pretya ceha ca mānavaḥ|'iti| atropavāsaśivapūjājāgaraṇāni trīṇyapi samuditāni pradhānakarmāṇi | adhikārabodhakeṣu nāgarakhaṇḍādivākyeṣu trayāṇāmapi phalasaṃbandhaśravaṇāt | tathā ca nāgarakhaṇḍe- 'upavāsaprabhāveṇa balādapi ca jāgarāt | śivarātrestathā tasyāṃ liṅgasyāpi prapūjayā | akṣayāllabheta bhogānchaivasāyujyamāpnuyāt |' iti |
Linked texts (4)
- Bhagavantabhāskara — Nīlakaṇṭha Dīkṣita 1625, Sanskrit
- Pratāpārka — Viśveśvarabhaṭṭa 1766, Sanskrit
- Kālanirṇaya (Kālamādhavīya) — Mādhava, Sanskrit
- Smṛtiprakāśa — Vāsudeva Ratha, Sanskrit