Jayasimhakalpadruma 13.p36.2
Jayasīṃhakalpadruma 13.p36.2
- Language
- Sanskrit
13.p36.2
tatra pūrvatithiraparāhnavyāpinī grāhyā|tāmāha hārītaḥ ‘yasyāṃ saṃdhyāgataḥ somo mṛṇālamiva dṛśyate | aparāhne tu yā tasyāṃ piṇḍānāṃ kāraṇaṃ dhruvam|’ iti | yattu kārṣṇājinivacanam-‘bhūtaviddhāmamāvāsyāṃ mohādajñānato'pi vā | śrāddhe karmaṇi ye kuryusteṣāmāyuḥ prahīyate | ’ iti | tatpūrvadine'parāhnavyāptyabhāvaviṣayam | tathābhūtāyā uttaratithergrāhyatāmāha hārītaḥ-‘aparāhne pitṝṇāṃ tu yāparāhnānuyāyinī|sā grāhyā pitṛkārye tu na pūrvāstānuyāyinī|’ iti | ubhayatra sāmyenaikadeśavyāptau kharvadarpādivākyānnirṇayaḥ | smṛtyantare'pi‘tithikṣaye sinīvālī tithivṛddhau kuhūrmātā | sāmye caiva kuhūrjñeyā vedavedāṅgavedibhiḥ |’ iti | pūrvā sinīvālī uttarā kuhūḥ | taduktaṃ vyāsena-‘dṛṣṭacandrā sinīvālī naṣṭacandrā kuhūrmātā|’ iti | śivarāghavasaṃvāde'pi-‘amāvāsyā tu yā hi syādaparāhnadvaye'pi sā|kṣaye pūrvā parā vṛddhau sāmyepi ca parā smṛtā|’iti | vaiṣamyeṇaikadeśavyāptau smṛtyantare-‘aparāhnadvayavyāpinyamāvāsyā yadā bhavet | tatrālpatvamahattvābhyāṃ nirṇayaḥ pitṛkarmaṇi |’ iti | yā'dhikavyāpinī sā grāhyetyarthaḥ | yadā dinadvaye'pyaparāhnaṃ na spṛśati tadā sāgnikaniragnikabhedena vyavasthā draṣṭavyā | taduktaṃ jābālinā-‘aparāhnadvayavyāpī yadi darśastithikṣaye | āhitāgneḥ sinīvālī niragnyādeḥ kuhūrmātā|’ iti | ādipadena strīśūdrayorapi saṃgrahaḥ | taduktaṃ laugākṣiṇā--‘sinīvālī dvijaiḥ kāryā sāgnikaiḥ pitṛkarmaṇi | strībhiḥ śūdraiḥ kuhūrjñeyā tathā vānagnikairdvijaiḥ |’ iti |
Linked texts (5)
- Hārītadharmasūtra (fragments) — Sanskrit
- Kārṣṇājinismṛti (fragments) — Sanskrit
- Laugākṣismṛti (fragments) — Sanskrit
- Pratāpārka — Viśveśvarabhaṭṭa 1766, Sanskrit
- Kālanirṇaya (Kālamādhavīya) — Mādhava, Sanskrit