Jayasimhakalpadruma 14.p4.20

14.p4.20

anantaraṃ daśāṃśena kramāddhomādikaṃ caret | tadante mahatīṃ pūjāṃ kuryādbrāhmaṇatarpaṇam | tato mantraprasiddhyarthaṃ guruṃ saṃpūjya toṣayet|evaṃ ca mantrasiddhiḥ syāddevatā ca prasīdati| athavānyaprakāro'yaṃ pauraścaraṇiko vidhiḥ| candrasūryoparāge ca snātvā prayatamānasaḥ | sparśādimokṣaparyantaṃ japenmantraṃ samāhitaḥ| japādaśāṃśato homastathā homācca tarpaṇam | evaṃ kṛtvā tu mantrasya jāyate siddhiruttamā| homāśaktau japaṃ kuryāddhomasaṃkhyācaturguṇam | ṣaḍguṇaṃ cāṣṭaguṇitaṃ yathāsaṃkhyaṃ dvijātayaḥ | teṣāṃ strīṇāṃ tu vijñeyasteṣāmeva samo japaḥ| yaṃ varṇamāśritaḥ śūdrastajjapastasya kīrtitaḥ | mūlamantraṃ samuccārya tadante devatābhidhām | dvitīyāntāmahaṃ paścāttarpayāmi namontakaḥ | tarpaṇasya daśāṃśena mārjanaṃ kathitaṃ kila | taccaivaṃ devatārūpaṃ dhyātvātmānaṃ prapūjya ca | namontaṃ mantramuccārya tadante devatābhidhām | dvitīyāntāmahaṃ paścādabhiṣiñcāmyanena ca | toyairañjalinā śuddhairabhiṣiñceta mūrdhani | mārjanasya daśāṃśena brāhmaṇānapi bhojayet | viprārādhanamātreṇa vyaṅgaṃ sāṅgaṃ bhavedyataḥ | japo'rccāpūrvako homastarpaṇaṃ cābhiṣecanam | bhūdevapūjanaṃ pañcaprakāraiśca puraskriyā | ' ityādi | tacca rahasyapuraścaraṇaṃ grastāste grastodaye ca na bhavati | sparśādimuktiparyantamityabhidhānāt | tayośca yāvaddarśanagocaraḥ ityuktyā darśanayogyatvāpekṣaṇādityalam | pūrvanirṇayaprasaṅgenānyān‍yapi parvāṇyatraiva pradarśyante | tathā ca viṣṇupurāṇe'caturdaśyaṣṭamī caiva amāvāsyā ca pūrṇimā|parvāṇyetāni rājendra ravisaṃkrāntireva ca |' iti |